काठमाडौं। क्यानडा ट्वान्टी–२० त्रिकोणात्मक सिरिजको दोस्रो खेलमा नेपाल र ओमान भिड्दैछन्। किङ सिटीमा आइतबार हुने खेल राति ९:४५ बजे हुनेछ।
शनिबार राति भएको पहिलो खेलमा घरेलु टोली क्यानडासँग नेपाल १४ रनले पराजित भएको थियो। क्यानडाले दिएको १२४ रनको लक्ष्य पछ्याएको नेपालले १९ ओभरमा सबै विकेट गुमाउँदै १०९ रन मात्रै बनाउन सक्यो।
कप्तान रोहितकुमार पौडेलले सर्वाधिक ३७ रन बनाए। कुशल मल्ल १२, देव खनाल ११ र सन्दीप लामिछाने १० रनमा आउट हुँदा अन्य ब्याटरले दोहोरो अंकमा रन बटुल्न सकेनन्। त्यसैले नेपाल जारी प्रतियोगितामा पहिलो जितको खोजिमा हुनेछ।
नेपाल पछिल्ला ११ अन्तर्राष्ट्रिय खेलमा जितविहीन छ। ओमानसँगको खेलमार्फत नेपाल पुनरागमन गर्ने लक्ष्यमा हुनेछ।
