काठमाडौं। भिओला नामुद्दुको निर्णायक गोलसँगै वालिङ नगरपालिकाले एन्फा महिला लिगमा लगातार दोस्रो जित हासिल गरेको छ।
सातदोबाटोस्थित एन्फा कम्प्लेक्समा सोमबार भएको खेलमा वालिङले संकटा फुटबल क्लबलाई १-० ले पराजित गरेको हो। जितसँगै वालिङले दुई खेलबाट ६ अंक जोडेको छ। संकटा भने अंकविहीन छ।
३४औं मिनेटमा भिओलाको गोलमार्फत वालिङलाई सुरुआती अग्रता दिलाएकी थिइन्। त्यही गोल निर्णायक बन्यो।
