काठमाडौं। राष्ट्रिय टोलीका अधिकांश खेलाडी भएर पनि विभागीय डर्बीमा राम्रो खेल पस्किन नसकेको एपिएफले अब एन्फा महिला लिगमा लामो सास फेर्न पाउनेछ।
किनभने अब उसको लडाइँ डर्बी बाहिरका टोलीसँग हुनेछ। मुख्य प्रशिक्षक जीवेशकुमार पाण्डे भन्छन्, ‘विभागीय टोलीसँग भएर अलिक गाह्रै भयो। हामीलाई अब केही सहज हुनेछ।’
साबिक विजेता एपिएफले पहिलो खेलमा नेपाल पुलिस क्लबलाई दबाबमै राखेको थियो। तर, सावित्री भण्डारीविना खेलेको एपिएफले पाएको मौकालाई सदूपयोग गर्न सकेन। त्यसैले लिगका पछिल्ला आठ खेलमा पहिलोपल्ट एपिएफ अंक बाँड्न बाध्य भएको थियो।
दोस्रो खेल पनि एपिएफका लागि त्यति सहज बनेन। त्रिभुवन आर्मीकी गोलकिपर अन्जना रानामगरले बल क्लियर गर्न सक्ने अवस्थामा मिडफिल्डर अनिता केसीलाई डी बक्सभित्र लडाएपछि एपिएफले लिगमा पहिलो जितको स्वाद चाख्न पाएको थियो। त्यो जित थियो २-१ को।
उक्त खेलमा २-१ को जित हासिल गर्दै चार अंक पुर्याएको एपिएफ तालिकामा तेस्रो स्थानमा छ। अब यो स्थान सुधार्न एपिएफले सोमबार सातदोबाटोस्थित एन्फा कम्प्लेक्समा अपरान्ह्र ४:१५ बजे हुने खेलमा चन्द्रपुर नगरपालिकाको सामना गर्नेछ।
चन्द्रपुरले जारी लिगमा लय भेटाउन सकेको छैन। पहिलो खेलमै चन्द्रपुरले कोशी प्रदेशसँग १-१ को बराबरी खेलेको थियो। लगभग अंक गुमाइसकेको अवस्थामा रजनी थोकरले गोल गर्दै चन्द्रपुरलाई हारबाट बचाएकी थिइन्। दोस्रो खेलमा पनि लिगकै कमजोर टोली संकटा फुटबल क्लबसँग गोलरहित बराबरी खेल्दै अंक बाँडेको थियो।
चन्द्रपुर दुई अंकसहित तालिकाको सातौं स्थानमा छ। सोमबारको खेलमा चन्द्रपुरको लक्ष्य एफिएफलाई रोक्ने नै हुनेछ। यो गर्न सके चन्द्रपुरले थप एक अंक पाउने छ।
