काठमाडौं। शतप्रतिशत जित निकाल्ने एक मात्रै टोली कोशी प्रदेश आइतबार एन्फा महिला लिगको तेस्रो खेल खेल्न मैदान उत्रिँदा सोही लय समात्ने प्रयासमा हुनेछ।
सातदोबाटोस्थित एन्फा कम्प्लेक्समा जारी लिगमा कोशीले वालिङ नगरपालिकालाई ४-० ले पराजित गर्दै सानदार सुरुआत गरेको थियो। यद्यपि, यसै वर्ष लिगमा डेब्यु गरेको बागमती युथ क्लबसँग भने कोशीले २-१ को नतिजा निकाल्न संघर्ष गर्नुपरेको थियो।
दुवै खेलमा समीक्षा मगरले उत्कृष्ट प्रदर्शन गर्दै तीन गोल गरेकी छन्। आइतबार कर्णाली प्रदेशविरुद्ध हुने तेस्रो खेलमा पनि कोशीले समीक्षाबाट यस्तै प्रदर्शनको अपेक्षा राख्नेछ। यो खेल १२:३० बजे हुनेछ। कर्णाली भने उत्कृष्ट प्रदर्शन गरिरहेको कोशीलाई रोक्ने लक्ष्यसाथ मैदान उत्रिने छ।
पहिलो खेलमा कर्णालीले चन्द्रपुर नगरपालिकासँग १-१ को बराबरी खेल्दै अंक बाँडेको थियो। दोस्रो खेलमा भने ज्याकिलिन नस्सालीले ह्याट्रिक गरिदिँदा कर्णालीले वालिङ नगरपालिकासँग ४-० को फराकिलो हार बेहोर्न परेको थियो। कोशी ६ अंकसहित शीर्ष स्थानमा छ। एक अंक जोडेको कर्णाली आठौं स्थानमा छ।
