काठमाडौं। अलेक्जेन्डर इसाकको गोलसँगै न्युक्यासल युनाइटेडले इङ्लिस प्रिमियर लिगमा दोस्रो जित हासिल गरेको छ।
दोस्रो खेलमा बोर्नेमाउथसँग न्युक्यासलले १–१ को बराबरी खेलेको थियो। तेस्रो खेलमा पनि टोटनह्यामसँग बराबरीउन्मुख थियो। तर, खेल सकिन १२ मिनेटअघि इसाकले गोल गर्दै न्युक्यासललाई २–१ को जित दिलाए।
जितसँगै चौथो स्थानमा उक्लिएको न्युक्यासलले तीन खेल सात अंक जोडेको छ। समान खेल खेलेको टोटनह्यामको चार अंक छ।
लोयड केलीले मिलाइदिएको बललाई जाली चुमाउँदै हार्वे वार्नेसले ३६औं मिनेटमै न्युक्यासललाई सुरुआती अग्रता दिलाएका थिए। तर, ५६औं मिनेटमा डेन बर्नले आफ्नै पोस्टमा गोल गर्न पुगेपछि न्युक्यासल १–१ को बराबरीमा आइपुगेको थियो।
तर, ज्याकब मर्फीले अर्को उत्कृष्ट एसिस्ट दिँदै न्युक्यासललाई तीन अंक दिलाए।
