काठमाडौं। लुइस स्वारेजको दुई गोलको मद्दतमा इन्टर मियामीले सिनसिनाटीलाई २–० ले हराउँदै यस सिजनको मेजर लिग फुटबलको प्लेअफमा स्थान पक्का गरेको छ।
उरुग्वेका अनुभवी फरवार्ड सुआरेजले खेलको ३२ सेकेन्डमै गोल गरेका थिए भने त्यसको पाँच मिनेटपछि दोस्रो गोल थप्दा लिओनल मेसीबिना नै मियामीले पोस्ट सिजनमा आफ्नो स्थान सुरक्षित गरेको थियो।
दोस्रो स्थानमा रहेको सिनसिनाटीभन्दा मियामी आठ अंकले अगाडि छ। जुलाई १४ मा कोपा अमेरिकाको फाइनलमा अर्जेन्टिनाले कोलम्बियामाथि जित हात पार्दा घुँडामा चोट लागेपछि मेसीले कुनै पनि खेल खेलेका छैनन्।
तर, मियामीले मेसी नियमित सिजनको अन्त्यअघि नै फर्कने अपेक्षा गरेको छ। जुन अक्टोबर १९ मा समाप्त हुनेछ र अर्को हप्ताबाट प्लेअफका खेल सुरु हुनेछ।
