काठमाडौं। इङ्लिस प्रिमियर लिग क्लब चेल्सीले जोआओ फेलिक्सलाई सात वर्षका लागि अनुबन्ध गरेको छ।
इङ्लिस मिडियाका अनुसार चेल्सीले २४ वर्षीय फेलिक्सलाई एथ्लेटिको मड्रिडबाट स्टामफोर्ड ब्रिजमा फिर्ता ल्याउन करिब ४ करोड ६० लाख पाउन्ड (५ करोड ९९ लाख ५० हजार अमेरिकी डलर) तिरेको छ।
फेलिक्सले २०२२-२३ सिजनमा चेल्सीमा आफ्नो ६ महिनाको ऋण स्पेल बिताएका थिए। २० खेल खेलेका उनले ४ गोल गरे। बार्सिलोनामा लोनमा खेल्दा उनले ४४ खेलमा १० गोल गरेका थिए।
एट्लेटिकोले सन् २०१९ मा बेनफिकाबाट फेलिक्सलाई १२ करोड ६० लाख युरो (१४ करोड अमेरिकी डलर) मा अनुबन्ध गरेको थियो। उनले १३१ खेलमा ३४ गोल गर्दै सन् २०२१ मा ला लिगाको उपाधि जितेका थिए।
