काठमाडौं । नेपाल समूह विजेता बन्दै थाइल्याण्ड महिला टी -ट्वान्टी स्म्यास क्रिकेटको सेमिफाइनलमा प्रवेश गरेको छ ।
बुधबार भएको समूह चरणको अन्तिम खेलमा थाइल्याण्ड 'ए' टिमलाई ९ विकेटले हराउँदै नेपाल समूह 'ए' को विजेता बन्दै सेमिफाइनलमा पुगेको हो ।
बैंकमा थाइल्याण्ड 'ए' ले दिएको २० रनको लक्ष्य नेपालले ३ ओभर ३ बलमा मात्र १ विकेट गुमाएर पुरा गर्यो । नेपालको जितमा ममता कुमारी चौधरीले ८ रन जोडिन । यस्तै नेरी थापाले अविजित ५ तथा डोली भट्टले अविजित २ रन जोडिन ।
यसअघि टस हारेर पहिले ब्याटिङ गरेको थाइल्याण्ड 'ए' १५ ओभर ४ बलमा अलआउट हुँदै १९ रन बनाएको थियो ।
थाइल्याण्डकी थान्चानोक फोप्लुकले सर्वाधिक ४ रन जोडिन । त्यस्तै वार्ली सिनसोङले ३ रन बनाईन् । थाइल्याण्डले ७ रन अतिरिक्त रन पाएको थियो ।
थाइल्याण्डलाई सस्तैमा समेट्न आरती बिडारीले ३ विकेट लिईन् । यस्तै इन्दु बर्मा र सरिता मगरले २/२ विकेट आफ्नो नाममा लेखाईन ।
जितसंगै नेपाल ४ खेलमा अपराजित रहदै सेमिफाइनलमा पुगेको हो । समूह 'ए' मा रहेको नेपालले ४ खेलबाट ८ अंक जोड्यो । यस समूहबाट ६ अंक जोडेको युएई उपविजेता बन्दै सेमिफाइनलमा पुग्न सफल भयो । थाइल्याण्ड 'ए', मलेसिया र चीन भने प्रतियोगिताबाट बाहिरिएको छ ।
अब नेपालले सेमिफाइनलमा शुक्रबार समूह 'बी' को उपविजेता इन्डोनेसियासंग खेल्नेछ ।
नेपालले पहिलो खेलमा चीनलाई १० विकेटले हराएको थियो । यस्तै दोस्रो खेलमा मलेसियालाई ६ विकेटले पराजित गरेको थियो । तेस्रो खेलमा नेपालले युएईलाई ६ विकेटले हराएको थियो ।
-1736609631.jpeg)
-1736605265.jpeg)
