काठमाडौं। सन् २०२४ को ट्वान्टी–२० विश्वकपको उपाधि जितेपछि रोहित शर्माले यस फर्म्याटको अन्तर्राष्ट्रिय क्रिकेटबाट सन्न्यास लिएका छन्।
विराट कोहली र रविन्द्र जडेजाले पनि यो फर्म्याटबाट सन्न्यास लिइसकेका छन्। अब भारतीय टोली परिवर्तनतिर छ। हिटम्यान रोहितपछि हार्दिक पाण्ड्या ट्वान्टी–२० टोलीको कप्तानी सम्हाल्ने सबैभन्दा ठूलो दाबेदार हुन्। तर, आगामी श्रीलंका भ्रमणमा उनको स्थानमा सूर्यकुमारलाई ट्वान्टी–२० कप्तानको जिम्मेवारी दिइएको छ।
हार्दिकले अहिलेसम्म तीन ओडीआई र १६ ट्वान्टी–२० खेलमा भारतीय टोलीको कप्तानी गरिसकेका छन्। उनले दुई सिजन आईपीएलमा गुजरात टाइटन्स र एक सिजन मुम्बई इन्डियन्सको कप्तानीसमेत गरेका छन्।
सूर्यकुमारलाई नयाँ जिम्मेवारी दिनुमा हार्दिकको चोटको समस्या प्रमुख कारण मानिएको छ। यसअघि पनि सूर्यकुमारले भारतीय टोलीको कप्तानी गरिसकेका छन्।
अष्ट्रेलियाविरुद्धको घरेलु ट्वान्टी–२० सिरिजमा पनि सूर्यकुमारले भारतीय टोलीको नेतृत्व गरेका थिए। सूर्यकुमारले घरेलु मैदानमा मुम्बईको कप्तानीसमेत गरेका छन्।
चोटले पछिल्ला केही वर्षदेखि हार्दिकलाई सताइएको छ। गत वर्ष एकदिवसीय विश्वकपमा बंगलादेशविरुद्धको खेलमा बलिङ गर्दा उनको खुट्टामा चोट लागेको थियो।
तर, आईपीएल २०२४ मा उनले रोहितको स्थानमा मुम्बई इन्डियन्सको जिम्मेवारी सम्हालेका थिए। हार्दिक ट्वान्टी–२० विश्वकपमा फेरि टिममा फर्किएका थिए। सन् २००२ को सुरुदेखि भारतले खेलेका ७९ ट्वान्टी–२० मध्ये हार्दिकले ४६ खेल मात्र खेलेका छन्।
बुधबार छनोट समितिले आगामी श्रीलंका भ्रमणका लागि टोली घोषणा गर्न सक्नेछ। जुलाई २६ बाट सुरु हुने यो भ्रमण तीन खेलको ट्वान्टी–२० सिरिजबाट सुरु हुनेछ। ट्वान्टी–२० खेल पल्लेकेले र तीन एकदिवसीय खेल कोलम्बोमा खेलाइनेछ।
यो भ्रमण भारतीय प्रशिक्षकका रुपमा गौतम गम्भीरको पहिलो भ्रमण पनि हुनेछ। राहुल द्रविडको कार्यकाल सकिएपछि गम्भीरलाई हालै मुख्य प्रशिक्षकमा नियुक्त गरिएको छ।
श्रीलंका भ्रमणअघि भारतीय टोली पाँच खेलको ट्वान्टी–२० सिरिज खेल्न जिम्बावे गएको थियो। जसमा शुभमन गिलको नेतृत्वमा भारत ४–१ ले विजयी भएको थियो। यो भ्रमणमा रहेका कति खेलाडीले श्रीलंका भ्रमणमा स्थान पाउँछन् त्यो भने हेर्न बाँकी छ।
-1732933394.jpg)
-1732928900.webp)
1711199972.jpeg)
