काठमाडौँ। बागमती युवा क्लबले शहीद स्मारक ‘सी’ डिभिजन लिगको शीर्ष स्थानमा पुनरागमन गरेको छ।
सातदोबाटोस्थित एन्फा कम्प्लेक्स बुधबार सम्पन्न खेलमा महावीर क्लबलाई ४-० गोल अन्तरले पराजित गर्दै बागमती शीर्ष स्थानमा फर्किएको हो।
जितसँगै बागमतीले ९ खेलमा २० अंक जोडेको छ। पराजित महावीर समान खेलबाट ९ अंकका साथ ११औँ स्थानमा छ। बागमतीको जितमा राज भुसालले २ गोल गरे। यस्तै, दीपेश राई र सिर्जनराज गौतमले १/१ गोल गरे।
खेलको ३५औँ मिनेटमा दुवै टोली १० खेलाडीमा समेटिए। एक अर्कासँग झगडा गरेपछि रेफ्री प्रतीक घिमिरेले बागमतीका अभिषेक वाइबा लामा र महावीरका सुरज थारुलाई सिधै रातो कार्ड देखाए।
पहिलो हाफको इज्ज्युरी समयमा दीपेशले गोल गर्दै बागमतीलाई अग्रता दिलाए। ५३औँ मिनेटमा सिर्जनले टोलीको अग्रता दोब्बर बनाए।
त्यसको तीन मिनेटपछि नै राजले टोलीका लागि तेस्रो गोल गरे। ५७औँ मिनेटमा राजले व्यक्तिगत दोस्रो गोल गर्दै बागमतीलाई ४-० को सहज जित दिलाए।
-1732631466.jpeg)
