काठमाडौं । घरेलु लिगलाई खेलको स्तर मापन र नयाँ खेलाडीको उत्पादनको आधार मानिन्छ । लिगको स्तरीयताले त्यसको व्यवसायीकरणमा ठुलो भुमिका खेलेको हुन्छ ।
लिगको संरचना बर्षभरी खेलाडीलाई व्यस्त राख्न बनेको हुन्छ । नेपालको घरेलु फुटबलमा भने छोटो समयको लिग हुने गरेको छ । लिगको निरन्तरतामा धेरै प्रश्नहरु उठ्ने गरेका छन् ।
अखिल नेपाल फुटबल संघ एन्फाले करिब पाँच बर्षपछि 'ए' डिभिजन लिगको आयोजना गर्यो । रेलिगेशन विनाको लिगले सर्वत्र चर्को आलोचन समेत खेप्यो । एन्फा आफैले 'ए' डिभिजन लिगलाई ‘वार्मअप’ लिग भनेर परिभाषित गर्यो ।
घरेलु लिग बन्द हुदाँ धेरै खेलाडी बेरोजगार थिए । कतिले खेल्नै पाएका थिएनन् । राष्ट्रिय टिमका खेलाडीको स्तर खस्किएको थियो ।
झण्डै पाँच बर्षपछि सुरु भएको लिगमा केही नयाँ पुराना अनुहार दृष्यमा आएका छन् । तर राष्ट्रिय टिमका खेलाडीको प्रर्दशन भने तारिफ योग्य रहन सकेन । धेरै खेलाडी फर्ममा देखिन सघर्षरत रहे । फरवार्डहरु गोलका लागि तड्पिरहेका थिए । राष्ट्रिय टिममा निरन्तर उपस्थिति जनाएका खेलाडीहरु ए डिभिजन लिगमा खासै जम्न सकेनन् ।
शीर्ष डिभिजनको लिगमा राष्ट्रिय टिमका मुख्य चार खेलाडीलाई देख्न पाईएन । मिडफिल्डर रोहित चन्दले ईन्डोनेशियामा व्यवसायीक फुटबल खेल्न व्यस्त थिए । गोलकिपर किरण चेम्जोङ माल्दिभ्सको लिग खेलिरहेका थिए । मुख्य डिफेन्डर अनन्त तामाङ र आदित्य चौधारी आन्तरिक समस्यामा फसे ।
आदित्यलाई चोटले सतायो भने अनन्त मुख्य दुई क्लबसंगको अनुबन्धन विवादबाट पिरोलिए । राष्ट्रिय टिमका फरवार्ड नवयुग श्रेष्ठ घाईते भएका कारण धेरै समय मैदान बाहिर रहे । सुजर श्रेष्ठ समेत हात भाँचिएपछि लामो सम मैदानमा देखिएनन् । नवयुगले लिगमा जम्मा २ गोल गर्न सफल भए । सुजल भने गोलविहिन रहे ।
अग्रपंक्तिका भरत खवास सुरुवाती खेलमा जम्न नसकेपनि पछिल्लो खेलमा आफुलाई प्रमाणित गरे । लिगमा सर्वाधिक गोल गर्ने तीन खेलाडीको सुचिमा आफुलाई समावेश गर्दै उनले वेस्ट फरवार्डको उपाधि हात पारे । दोहोरो पहेलो कार्डका कारण भरतले दुई खेल गुमाएका थिए ।
राष्ट्रिय टिमका मुख्य स्ट्राईकर विमल घर्तिमगर समेत लिगमा खासै चल्न सकेनन् । लिगमा पाँच खेल खेलेपछि उनी बेल्जियम ट्रायलका लागि उडेका थिए । पाँच खेलमा विमलले मात्र दृुई गोल गर्न सफल भएका थिए ।
राष्ट्रिय टिमका दुई मिडफिल्डर अन्जन विष्ट र सुनिल वलले आफुलाई लिगमा प्रमाणित गर्न सफल भए । विङ्गरको रुपमा मनाङबाट अन्जन र थ्री स्टारबाट सुनिलले राम्रो खेल कौशल देखाए । लिग अवधिभर पुरा समय खेल्ने अन्जन एक मात्र खेलाडी हुन् । आवश्यकता अनुसार बिङ्गगर र स्ट्राईकरको भुमिकामा देखिएका अन्जनले ५ गोल गरेका थिए । सुनिलको नाममा भने एक गोलमात्र रह्यो ।
गोलकिपरमा आर्मीका विकेश कुथु, थ्री स्टारका एलेन न्यौपाने र मनाङका विशाल श्रेष्ठको प्रर्दशन औसत रह्यो । लिगमा तीनै खेलाडीको प्रर्दशन ठिकठाक रह्यो । राष्ट्रिय टिममा रहेर पनि बारम्बार डेब्यु गर्नबाट बञ्चित विशाल लिगको सर्वाेत्कृष्ट गोलकिपर चुनिए ।
राष्ट्रिय टिममा लामो समयपछि पुनरागमन गरेका निराजन खड्का समेत औसत देखिए । मनाङविरुद्ध अस्वस्थ्य देखिएका उनले २२ औ मिनेटमा मैदान छोडेका थिए । पछिल्लो समय चोटबाट पिरालिएका विशाल राईले लिगमा आफुलाई राम्रो मिडफिल्डरको रुपमा प्रमाणित गर्न सफल भए ।
लिग च्याम्पियन मनाङका प्लेमेकर हेमन गुरुङ प्रतियोगिताभर छाउन पुगे । मनाङलाई लिग च्याम्पियन बनाउन महत्वपुर्ण भुमिका खेलेका उनी सर्वाेत्कृष्ट मिडफिल्डर चुनिएका थिए । अर्का मिडफिल्डर हेमन्त थापा मगर भने लिग अवधिभर लयमा देखिन संघर्षरत रहे । च्यासलको जर्सीमा मैदानमा देखिएका उनले गोलको खाता समेत खोल्न सकेनन् ।
डिफेन्समा पुलिसका दिनेश राजवंश, च्यासलका देबेन्द्र तामाङ र मनाङका विराज महर्जनले सुधारिएको प्रर्दशन देखाउन सफल भए ।
