इलाम। साविक उपविजेता फाकफोकथुम गाउँपालिकालाई हराउँदै सूर्योदय नगरपालिका दोस्रो माईजोगमाई गाउँपालिका अध्यक्ष कप अन्तरपालिका आमन्त्रित पुरुष फुटबल प्रतियोगिताको अन्तिम ८ मा प्रवेश गरेको छ।
प्रतियोगिताको दोस्रो प्रि–क्वार्टरफाइनल खेलमा सूर्योदयले २–० गोल अन्तरको जित निकालेको हो। सूर्योदयको जितमा पाल्देन तामाङ र सौरभ कार्कीले गोल गरे।
खेलको आठौँ मिनेटमा पाल्देनले सूर्योदयलाई अग्रता दिलाए। ६१औँ मिनेटमा कप्तान अर्जुन गुरुङको कर्नर प्रहारलाई हेडरमार्फत गोल गर्दै सौरभले अग्रता दोब्बर बनाए।
खेलको म्यान अफ दी म्याच सूर्योदयका कप्तान गुरुङ घोषित भए। जितसँगै सूर्योदयले माई नगरपालिकासँग भेट पक्का गरेको छ।
प्रतियोगितामा बिहीबार पहिलो क्वार्टरफाइनल खेलमा घरेलु टिम माईजोगमाई गाउँपालिका र रोङ गाउँपालिका तथा दोस्रो क्वार्टरफाइनल खेलमा देउमाई नगरपालिका र चुलाचुली गाउँपालिका भिड्नेछन्।
माईजोगमाई गाउँपालिका खेलकुद विकास परिषदको आयोजनामा बालागुरु खेल मैदानमा आगामी बैशाख ३१ गतेसम्म प्रतियोगिता सञ्चालन हुनेछ। प्रतियोगिताको विजेताले २ लाख ११ हजार १११ र उपविजेताले १ लाख २१ हजार १११ रुपैयाँ प्राप्त गर्नेछ।
