युएईसंगको सिरिजका लागि नेपाली टिमको बन्द प्रशिक्षण सुरु

गृहपृष्ठ
क्रिकेट

बुधबार, पुस २५, २०७५ खेलपाटी संवाददाता

काठमाडौं । युएईसंगको एकदिवसीय र टी- ट्वान्टी सिरिजका लागि नेपाली राष्ट्रिय पुरुष क्रिकेट टोलीको बन्द प्रशिक्षण सुरु भएको छ ।

आगामी माघको दोस्रो साताबाट सुरु हुने सिरिजका लागि बुधबारबाट नेपाली टोलीको बन्द प्रशिक्षण सुरु भएको हो । बन्द प्रशिक्षणको पहिलो दिन खेलाडीहरुले शारीरिक अभ्यास गरेका छन् ।

बिहिबारबाट टोलीको पुर्व प्रशिक्षण सुरु हुने नेपाली टोलीका मुख्य प्रशिक्षक जगत टमटाले खेलपाटीलाई जानकारी गराए ।

पहिलो दिनको बन्द प्रशिक्षणमा १६ खेलाडी सहभागी भएको प्रशिक्षक टमटाले बताए ।

'आजबाट बन्द प्रशिक्षण सुरु भएको छ । प्राय सबै खेलाडी सहभागी भएका छन्,' प्रशिक्षक टमटाले खेलपाटीसंग भने, 'केहि खेलाडी प्रतियोगिताका लागि इनरुवा रहेका छन् । उनीहरु बिहिबार क्याम्पमा सामेल हुनेछन् । बिहिबारबाट आउटडोर प्रशिक्षण सुरु हुनेछ ।'

बन्द प्रशिक्षणका लागि नेपालले २० खेलाडीलाई बोलाएको छ । जसमा केहि खेलाडी सुनसरीको इनरुवामा जारी एमएम कप एकदिवसीय क्रिकेटमा व्यस्त रहेका छन् । यस्तै कप्तान पारस खड्का र दिपेन्द्र सिंह ऐरी भने अष्ट्रेलियामा रहेका छन् ।

बन्द प्रशिक्षणपछि युएईसंग खेल्ने नेपाली टोलीको घोषणा हुनेछ । नेपालले माघ ११ देखि माघ २० सम्म युएईको भ्रमण गर्नेछ ।

नेपालले युएईसंग पहिले एकदिवसीय सिरिज खेल्नेछ । नेपालले माघ ११, १२ र १४ गते एकदिवसीय सिरिज खेल्नेछ । यस्तै माघ १७, १८ र २० मा टी-ट्वान्टी सिरिज खेल्नेछ ।

युएईविरुद्धको सिरिज नेपालको लागि दोस्रो एकदिवसीय अन्तर्राष्ट्रिय सिरिज हुनेछ । आईसीसीबाट एकदिवसीय मान्यता पाएपछि नेपालले नेदरल्याण्डसंग पहिलो एकदिवसीय सिरिज खेलेको थियो । जुन सिरिज १ - १ को बराबरी भएको थियो ।

नेपालले जिम्बाबेमा भएको विश्वकप छनोटबाट एकदिवसीय मान्यता पाएको थियो । युएईले पनि विश्वकप छनोटबाट एकदिवसीय मान्यता पाएको थियो ।

बन्द प्रशिक्षणमा रहेका नेपाली टोली :

पारस खड्का (कप्तान)

अविनाश बोहरा

बसन्त रेग्मी

भिम सार्की

बिक्रम सोब

बिनोद भण्डारी

दिपेन्द्र सिंह ऐरी

यानेन्द्र मल्ल

करण केसी

ललित भण्डारी