काठमाडौं । प्रथम बलेफी गाउँपालिका जिल्ला स्तरीय फुटबल प्रतियोगितामा आयोजक बलेफी गाउँपालिकाले विजयी सुरुवात गरेको छ ।
सिन्धुपाल्चोकको बलेफी गाउँपालिकामा भएको उद्घाटन खेलमा आयोजकले सुन्दरी गाउँपालिकालाई २–० गोल अन्तरले पराजित गर्याे । आयोजक बलेफी गाउँपालिकालाई जित दिलाउन राज कुमार घिसिङले दुई गोल गरे । खेलमा म्यान अफ दि म्याच अजय तामाङ घोषित भए ।
यस्तै बाह्रविसे नगरपालिकाले चौतारा साँगाचोकगढी नगरपालिकालाई १–० को झिनो अन्तरले पराजित गर्याे । बाह्रविसेलाई जित दिलाउन एक मात्रै निर्णायक गोल कृष्ण भण्डारीले गरे । कृष्ण म्यान अफ दि म्याच समेत चुनिए ।
प्रतियोगितामा बाह्रविसे नगरपालिका, चौतारा साँगाचोकगढी नगरपालिका, मेलम्ची नगरपालिका, हेलम्बु गाउँपालिका, लिसङ्खु पाखर गाउँपालिका, सुनकोशी गाउँपालिका, भोटेकोशी गाउँपालिका, ईन्द्रावती गाउँपालिका, बलेफी गाउँपालिका, त्रिपुरासुन्दरी गाउँपालिका गरी १० टिमको सहभागीता रहेको छ ।
सिन्धुपाल्चोक जिल्ला फुटबल संघको सहयोजनामा जारी प्रतियोगिताको विजेताले नगद १ लाख प्राप्त गर्नेछन् । यस्तै दोस्रो हुनेले ५० हजार नगद सहिद प्रमाण पत्र प्राप्त गर्नेछ ।
