काठमाडौं । नेपाली राष्ट्रिय क्रिकेट टोलीका खेलाडीहरुले दुई वर्षबाट रोकिएको पारिश्रमिक पाउने भएका छन् । राष्ट्रिय खेलकूद परिषद (राखेप) को पहलमा नेपाली क्रिकेट टोलीका सदस्यहरुले रोकिएको पारिश्रमिक पाउने भएका हुन् ।
अन्तर्राष्ट्रिय क्रिकेट परिषद (आईसीसी) ले नेपाल क्रिकेट संघलाई निलम्बन गरेपछि नेपाली क्रिकेट खेलाडीहरुले तलब पाएका थिएनन् । नेपाललाई आईसीसीले गत २०७३ सालको वैशाखमा निलम्बन गरेको थियो । तर, राखेपले विशेष पहल गरेपछि नेपाली खेलाडीहरुको पारिश्रमिक उपलब्ध गराउन आईसीसी तयार भएको हो ।
आईसीसीले राखेपले पठाएको खेलाडीको नामावलीमा वर्गीकरण अनुसार पारिश्रमिक उपलब्ध गराउने छन् । राखेपले आईसीसीलाई 'ए' , 'बी' र 'सी' गरी तीन तहमा नेपाली खेलाडीलाई वर्गीकरण गरेर नामावली पठाएको सदस्य सचिब केशव कुमार बिष्टका प्रेस सल्लाहकार रोहित दाहालले जानकारी गराए ।
'राखेपले पहल गरेपछि दुई वर्षबाट रोकिएको खेलाडीको तलब दिन आईसीसी सहमत भएको छ । हामीले आइतबार पत्र पठाईसकेका छौं,' प्रेस सल्लाहकार दाहालले खेलपाटीलाई भने, 'प्रशिक्षकले उपलब्ध गराएको खेलाडीको नाम पठाएका छौं । खेलाडीले चाडै पारिश्रमिक पाउनेछन् ।'
नेपाली राष्ट्रिय टोलीका मुख्य प्रशिक्षक जगत टमटाले खेलाडीको वर्गीकरण गरेर राखेपमार्फत पारिश्रमिकका लागि आईसीसीलाई पत्र पठाएको बताए ।
'लामो समयबाट रोकिएको खेलाडीहरुको तलबका लागि राखेपबाट पत्र पठाएका छौं । नेपालबाट खेलाडीले खेलेको समय र प्रदर्शनको आधारमा खेलाडीको वर्गीकरण गरिएको हो,' प्रशिक्षक टमटाले भने ।
राखेपले आईसीसीलाई पठाएको खेलाडी वर्गीकरणमा कप्तान पारस खड्कासहित उपकप्तान ज्ञानेन्द्र मल्ल, शरद भेषवाकर, वसन्त रेग्मी, सोमपाल कामी, सन्दीप लामिछाने र दीपेन्द्रसिंह ऐरी 'ए' श्रेणीमा रहेका छन् । यस श्रेणीका खेलाडीले मासिक ३५ हजार पारिश्रमिक पाउनेछन् ।
यस्तै पुर्व सदस्य शक्ति गौचन, करण केसी, ललित भण्डारी, रोहितकुमार पौडेल, ललितनारायण राजवंशी, आरिफ शेख र अनिलकुमार शाह 'बी' श्रेणीमा रहेका छन् । यस श्रेणीका खेलाडीले मासिक २५ हजार पाउनेछन् ।
त्यस्तै सुवास खकुरेल, सागर पुन, विनोद भण्डारी, सुशन भारी, किशोर महतो, दिलीप नाथ र सुनील धमला 'सी' श्रेणीमा रहेका छन् । उनीहरुले मासिक १५ हजार पारिश्रमिक पाउने छन् ।
-1736646447.jpg)
-1736609631.jpeg)
