एजेन्सी । युरोपियन क्लब फुटबलको सर्वाधिक प्रतिष्ठित प्रतियोगिता युईएफए च्याम्पियन्स लिग हो । जसको कारण च्याम्पियन्स लिगले हरेक सिजन रोमान्चकता प्रदान गर्ने गर्दछ ।
युरोपियन लिगका शीर्ष क्लबहरुले खेल्ने च्याम्पियन्स लिग सधै प्रतिस्पर्धात्मक हुने गर्दछ । च्याम्पियन्स लिग खेल्न सबै टोली सशक्त हुने गर्दछ । त्यसैले च्याम्पियन्स लिगमा बलियो मानिएको टोलीले पराजय र कमजोर मानिएको टोलीले जित निकालेको उदाहरण धेरै पाइन्छ ।
सधै झैँ यस सिजन पनि च्याम्पियन्स लिगका खेलहरु जारी छ । अब समूह चरणको अन्तिम खेलहरु बाँकी छ । समूह चरणको खेलहरु बाँकी रहदै केहि टोलीले भने नकआउट चरणमा स्थान बनाई सकेका छन् ।
यस सिजन पनि च्याम्पियन्स लिगमा अप्रत्याशित नतिजाहरु कायम आईरहेको छ । नकआउट चरणमा पुग्न केहि ठुला क्लबले जित निकाल्न संघर्ष गरिरहेका छन् । केहि साना टोलीले सहजै नकआउट चरण पार गर्ने संघारमा छन् ।
यस्तोमा यस सिजन पाँच क्लबहरु अपराजित रहेका छन् । बार्सिलोना, वायर्न म्युनिख लगायतका पाँच क्लबले अपराजित यात्रालाई कायम राखेका छन् । तीन पाँच क्लबहरु कुन कुन हो त ?
ओलम्पिक लियोन (फ्रान्स)
च्याम्पियन्स लिगमा अपराजित रहने पाँच टोलीमा फ्रेन्च क्लब लियोन पनि एक हो । फ्रेन्च लिगका पावरहाउस क्लबहरु पेरीस सेन्ट जर्मेन (पिएसजी), मोनाकोले उत्कृष्ट प्रदर्शन गर्न नसकिरहेको बेला लियोनले राम्रो छाप छोड्न सफल भएको छ ।
समूह एफ मा रहेको लियोनले पाँच खेल खेल्दै ७ अंक जोडेको छ । समूहको दोस्रो स्थानमा रहेको लियोनले चार बराबरी र एक जित निकालेको छ ।
लियोनले इंग्लिश प्रिमियर लिग क्लब म्यान्चेस्टर सिटीलाई पहिलो खेलमा २ - १ गोल अन्तरले हराउँदै सुखद सुरुवात गरेको थियो । यस्तै दोस्रो खेलमा पनि लियोनले सिटीसंग २ – २ गोलको बराबरी खेलेको थियो ।
आयाक्स (नेदरल्याण्ड)
आयाक्स नेदरल्याण्ड फुटबल ईतिहासको एक मात्र सफल क्लब हो । चार पटक च्याम्पियन्स लिग जितेको आयाक्सले यस सिजन पनि उत्कृष्ट प्रदर्शनलाई निरन्तरता दिईरहेको छ ।
आयाक्स यस सिजन अपराजित रहने टोलीमा एक हो । अघिल्ला खेलमा बेन्फिका, वायर्न म्युनिख, एईके एथेन्सविरुद्ध उत्कृष्ट प्रदर्शन गर्दै आयाक्सले आफुलाई बलियो प्रमाणित गरिरहेको छ ।
एथेन्सविरुद्ध ३–० को जित निकाल्दै च्याम्पियन्स लिगमा सुखद शुरुवात गरेको आयाक्स समूह ई मा ११ अंक जोडेर दोस्रो स्थानमा छ । आयाक्सले पाँच खेलमा तीन जित र दुई बराबरी खेलेको छ ।
पोर्टो (पोर्चुगल)
च्याम्पियन्स लिगमा हारको सामना गर्ने धेरै टोली रहेका छन् । यस सिजन लिभरपुल, इन्टर मिलान, पिएसजी, रियल मड्रिड जस्ता ठुला टोलीले हारको सामना गरेका छन् ।
तर, पोर्चुगिज क्लब पोर्टो भने यस सिजन अपराजित रहेका छन् । शाल्केसंग पहिलो खेलमा १–१ को बराबरी खेल्दै च्याम्पियन्स लिगको सुरुवात गरेको पोर्टोले यस सिजन नकआउट चरणमा स्थान पक्का गरिसकेको छ ।
पोर्टोले पाँच खेलमा ४ जित र १ बराबरी खेल्दै १३ अंकका जोडेर समूह डीको शीर्ष स्थान कायम राखेको छ ।
वायर्न म्युनिख (जर्मनी)
जर्मन क्लब वायर्नका लागि यस सिजन बुन्डेस लिगा फलदायी बन्न सकिरहेको छैन । बुन्डेस लिगमा सोचेको जस्तो पदर्शन गर्न नसकिरहेको वायर्नले च्याम्पियन्स लिगमा भने उत्कृष्ट प्रदर्शनलाई निरन्तरता दिईरहेका छन् ।
पाँच खेल सकिदा अपराजित रहेको वायर्नले समूह ई को शीर्ष स्थान कब्जा जमाएको छ । पहिलो खेलमा बेन्फिकालाई २–० ले हराएर च्याम्पियन्स लिगको सुरुवात गरेको वायर्नले नकआउट चरणमा स्थान पक्का गरिसकेको छ ।
वायर्नले पाँच खेलमा ४ जित र १ बराबरीको नतिजा निकाल्दै १३ अंक जोडेको छ । अब वायर्नले आफ्नो समूह चरणको अन्तिम खेलमा अर्को अपराजित टोली आयाक्ससंग खेल्नेछ ।
बार्सिलोना (स्पेन)
च्याम्पियन्स लिगमा स्पेनिस क्लब बार्सिलोना सधै उपाधिको दाबेदार क्लब मानिन्छ । र, यस सिजन पनि बार्सिलोनाले आफ्नो दाबेदार छविलाई कायम राखेको छ ।
स्ट्रार स्ट्राइकर लियोनल मेस्सीको कप्तानीमा मैदान उत्रने बार्सिलोना पाँच खेलमा अपराजित छ । डच क्लब पीएसभीलाई ४–० ले पराजित गर्दै च्याम्पियन्स लिगमा सुखद शुरुवात गरेको बार्सिलोनाले नकआउट चरणमा स्थान पक्का गरिसकेको छ । पीएसभीसंगको पहिलो खेलमा कप्तान मेस्सीले ह्याट्रिक नै गरेका थिए ।
समूह बी मा रहेको बार्सिलोनाले पाँच खेलमा ४ जित र १ बराबरी खेल्दै १३ अंक जोडेको छ । समूहको शीर्ष स्थानमा रहेको बार्सिलोनाले टोटेनहम, इन्टर मिलान जस्ता क्लबहरुलाई पछि पार्दै आफुलाई अब्बल साबित गरेको छ ।
-एजेन्सीको सहयोगमा
-1736575369.jpg)
-1736559847.jpg)
