काठमाडौं । भारतले दक्षिण अफ्रिकामा जारी आठौं संस्करणको आईसीसी महिला टी-ट्वान्टी विश्वकपमा विजयी सुरुआत गरेको छ ।
आईतबार केपटाउनमा भएको खेलमा पाकिस्तानलाई ७ विकेटले पराजित गरेर भारतले सुखद सुरुआत गरेको हो ।
पाकिस्तानले दिएको १ सय ५० रनको लक्ष्य भारतले १९ ओभरमा ३ विकेट गुमाएर पूरा गर्यो ।
भारतका लागि जेमिमा रोट्रिजेजले ३८ बलमा ५३ रनको अविजित ईनिङ खेल्दा शफाली बर्माले ३३ रन बनाईन् ।
रिचा घोषले अविजित ३१ रन बनाईन् । यात्सिका भाटियाले १७ रन बनाउँदा कप्तान हरमनप्रित कौरले १६ रन बनाईन्।
पाकिस्तानका लागि नशरा सन्धुले २ तथा सादिया ईकवालले १ विकेट लिईन् ।
त्यसअघि पहिले ब्याटिङ गरेको पाकिस्तानले २० ओभरमा ४ विकेट गुमाएर १ सय ४९ रन बनायो ।
पाकिस्तानका लागि कप्तान विस्मा मारुफले अविजित ६८ रन बनाईन् ।
मारुफले ५५ बलमा ७ चौकाका साथमा ६८ रन बनाईन् । ५ औं विकेटका लागि उनले अयाशा नसिमसँग ८१ रनको अविजित साझेदारी गरिन् ।
आयाशाले २५ बलमा २ चौका र २ छक्काको सहयोगमा ४३ रन बनाईन् ।
मुनिवा अलिले १२ तथा सिद्रा अमिनले ११ रन बनाईन् ।
भारतका लागि राधा यादवले २ तथा दिप्ति शर्मा र पूजा भातस्करले समान १/१ विकेट लिईन् ।
जितसँगै भारत १ खेलमा २ अंकका साथ समूह 'बी' को दोस्रो स्थानमा उक्लिएको छ ।
आज नै हुने दोस्रो खेलमा समूह 'ए' मा रहेका श्रीलंका र बंगलादेशबीच खेल हुदैछ ।
श्रीलंका यस विश्वकपमा लगातार दोस्रो जितको खोजीमा रहेको छ । श्रीलंकाले पहिलो खेलमा आयोजक दक्षिण अफ्रिकालाई पराजित गरेको थियो ।
यस विश्वकपमा पहिलो खेल खेल्दै गरेको बंगलादेश जित सहित सुखद सुरुआत गर्न चाहान्छ ।
दुई देशबीचको पछिल्लो पाँच टी-ट्वान्टी अन्तराष्ट्रियमा खेलमा श्रीलंका अपराजित रहेको छ ।
यस प्रतियोगिता २६ फेब्रुअरीसम्म जारी रहने छ । प्रतियोगितामा १० टोलीको सहभागीता रहेको छ ।
सहभागी १० टोलीलाई ५/५ टोलीको दुई समूहमा बिभाजन गरिएको छ ।
दुई समूहमा शीर्ष दुई टिम सेमिफाईनल प्रवेश गर्ने छन् ।
समूह 'ए' मा आयोजक दक्षिण अफ्रिका,साबिक बिजेता अष्ट्रेलिया,श्रीलंका,बंगलादेश र न्युजिल्याण्ड रहेका छन् ।
समूह 'बी' मा दुई पुर्व बिजेताहरु इंग्ल्याण्ड र वेस्ट इण्डिज,आयरल्याण्ड,भारत र पाकिस्तान रहेका छन् ।
