एजेन्सी । स्पेनिस क्लब रियल मड्रिड विश्वकै उत्कृष्ट क्लबहरु मध्ये एक हो । एक सय बर्ष पुरानो इतिहास बोकेको रियलले युरोपियन क्लब फुटबलमा आफ्नो छुट्टै छाप बनाएको छ ।
सन् १९०२ मार्चमा स्थापना भएको रियलले घरेलु लिग ला लिगा ३३ पटक जितेर कीर्तिमान बनाएको छ । यस्तै रियलले १३ पटक युईएफए च्याम्पियन्स लिग जितेर कीर्तिमान बनाएको छ । त्यस्तै रियलले कोपा डेल रे, क्लब विश्वकप जस्ता ट्रफीहरु चुमिसकेको छ ।
रियलको सफलतामा खेलाडीहरुको मुख्य भूमिका रहेको छ । खेलाडीको मेहेनत र उच्च प्रदर्शनले नै रियलले ठुला ठुला सफलता हात पारेका हुन् । र, रियलको यस सफलतामा डिफेन्डरहरुको भूमिका समेत उच्च छ । मजबुत डिफेन्सकै कारण रियलले बिपक्षिलाई गोल गर्न नदिएर ठुला ठुला सफलता हात पारेको छ ।
रियलबाट विश्व फुटबलका उत्कृष्ट डिफेन्डरहरुले खेलेका छन् । तर, रियलबाट खेलेका केहि डिफेन्डरहरु खास छन् । जुन, डिफेन्डरलाई रियलले सर्वकालीन महान डिफेन्डरको रुपमा राख्ने गरेका छन् ।
आज हामी रियलका पाँच सर्वकालीन महान डिफेन्डरहरुको चर्चा गर्नेछौं । रियलले आफ्नो क्लबका लागि पाएका पाँच महान डिफेन्डरहरु को को हुन त ? सुची हेर्नुहोस् ।
५. सर्जियो रामोस
खेल:५७८
खेलेको बर्ष : २००५ देखी हालसम्म
स्पेनिस डिफेन्डर रामोस हाल रियलका कप्तान हुन् । उनी सन् २००५ मा सेभियाबाट रियलमा आएका थिए । रामोस विश्वकै उत्कृष्ट डिफेन्डर मध्ये एक मानिन्छन् ।
रामोस रियलमा हरेक बर्ष उत्कृष्ट भुमिकामा देखिने गर्दछन् । उनलाई रियलमा उत्कृष्ट कप्तानको रुपमा समेत लिईन्छ । रामोस बिपक्षिको फरवार्डलाई रोक्न मात्र नभई गोल गर्न माहिर खेलाडी समेत हुन । रामोसले विश्व फुटबलमा उत्कृष्ट हेडरको रुपमा चिनाएका छन् ।
३१ बर्षिय रामोस रियल बाहेक अन्य क्लब जान चाहदैनन् । किनकी उनले रियलमा एउटा बेग्लै पहिचान बनाई सकेका छन् । रामोसले रियलबाट चार पटक च्याम्पियन्स लिग, तीन फिफा क्लब विश्वकप, तीन युरोपियन सुपर कप, चार ला–लिगा, दुई कोपा डेल रे र तीन स्पेनिस सुपर कप जितेका छन् ।
४. जोसे सान्टामारिया
खेल: ३३७
खेलेको बर्ष : १९५७/१९६६
उरुग्वेमा जन्मिएर स्पेनबाट पनि खेलेका सेन्टर डिफेन्डर सान्टामारिया रियलको महान तथा उत्कृष्ट डिफेन्डरमा पर्ने गर्छन् ।
उरुग्वेकै नेसनलबाट क्लब फुटबल सुरुवात गरेका सान्टामारिया ५० देखि ६० को दशकमा उत्कृष्ट डिफेन्डर रहेका थिए । जतिबेला रियलमा फ्रान्सिस्को गेन्टो,अल्फ्रेडो डी स्टाफानो, हेक्टर रियल, पुस्कास जस्ता खेलाडीहरुले खेल्ने गर्थे ।
सान्टमारीया २८ बर्षको हुँदा सन् १९५७ रियल आएका थिए । र, सान्टमारीयाले रियल आएकै सिजन ला–लिगा र युरोपियन कप उपाधि जित्न सफल भएका थिए ।
सान्टमारीयाले आफ्नो जीवनमा दुई क्लबबाट मात्र खेले । उनले उरुग्वेको नेसनल र रियल मड्रिडबाट मात्र खेले । सान्टमारीयाले सन् १९६६ मा फुटबलबाट सन्यास लिएका थिए ।
सन्यासअघि सान्टमारीयाले रियलबाट पाँच ला–लिगा, चार युरोपियन कप, एक स्पेनिस कप र एक इन्टरकन्टिनेन्टल कप जितेका थिए ।
३. रोबर्टो कार्लोस
खेल : ५२७ खेलेको
खेलेको बर्ष : १९९६–२००७
गति र बायाँ खुट्टाको पावर जुन धातुले बनाएको जस्तै थियो, उनि थिए 'रोबर्टो कार्लोस' । उनै पहिलो जेनेरेसनका ब्राजिलियन डिफेन्डर कार्लोसले रियलबाट खेल्दै आफुलाई महान डिफेन्डर भएको सिद्ध गरे ।
कार्लोस भन्ने वित्तिकै विश्व फुटबलमा मास्टर अफ फ्रिकिकको रुपमा चिनीने गर्छन् । अट्याकिङ डिफेन्समा उत्कृष्ट प्रदर्शन गर्न सक्ने खेलाडी कार्लोसले करिब ११ बर्ष रियलमा बिताए । तर, रियलबाटै उनले धेरै कुरा पाए ।
सन् १९९६ मा इन्टर मिलानबाट रियल आएका कार्लोसले सन् २००७ मा क्लब छोडेका थिए । तर, कार्लोसले रियलमा सबैभन्दा धेरै खेल खेल्ने विदेशी खेलाडीको कीर्तिमानी नै बनाए ।
कार्लोस डिफेन्स मात्र हैन गोल गर्न पनि माहिर थिए । कार्लोसको फ्रिकिकलाई भगवानले दिएको सुन्दर गिफ्ट भन्ने समेत गरिन्छ । लामो दुरीको फ्रिकिकमा गोल गर्ने उनको खुबीको अहिले पनि चर्चा हुन्छ ।
कार्लोसले रियलबाट तीन युरोपियन कप, दुई इन्टरकन्टिनेन्टल कप, एक युरोपियन सुपर कप, चार ला–लिगा र तीन स्पेनिस सुपर कप जितेका थिए । जसमा उनले ४७ गोल समेत गरेका थिए ।
२. मिगुएल चेन्डो
खेल :४९७
खेलेको बर्ष : १९८२–१९९८
स्पेनिस डिफेन्डर चेन्डो एउटै क्लबबाट मात्र खेल्ने खेलाडी हुन् । उनले आफ्नो खेल जीवनको सुरुवात र अन्त्य समेत रियलबाट नै गरेका थिए । त्यसैले रियलका महान डिफेन्डरमा चेन्डो पर्ने गर्छन् ।
रियलको युथ टिमबाट सिनियर टोलीमा आएका चेन्डोले रियलको सिनियर टोलीमा करिब १६ बर्ष बिताए । त्यसैले चन्डोले रियलमा आफ्नो छुट्टै पहिचान बनाए ।
रियलले सन् १९९८ मा सातौँ पटक युरोपियन कप जितेपछि चन्डोले सन्यास लिएका थिए । ३६ बर्षको उमेरमा फुटबलबाट सन्यास लिएका चन्डोले रियलबाट एक युरोपियन कप, दुई युईएफए कप, सात ला–लिगा, दुई स्पेनिस कप, चार स्पेनिस सुपर कप र एक स्पेनिस लिग कप जितेका थिए ।
१. फर्नान्डो हिएरो
खेल : ६०१
खेलेको बर्ष : १९८९–२००३
स्पेनिस सेन्टर डिफेन्डर हिएरो रियल मड्रिडको महान डिफेन्डरको पहिलो नम्बर आउने गर्छन् । किनकी हिएरो अन्य डिफेन्डर भन्दा फरक क्षमताका डिफेन्डर हुन् ।
डिफेन्डर हिएरोले रियलबाट ६०१ खेल खेल्दै १२७ गोल गरेका छन् । जुन एक डिफेन्डरका लागि मुस्किल कार्य हो । तर, हिएरोले भने आफुलाई फरक प्रमाणित गरे ।
हिएरो मैदानमा बल पोजिसन मिलाउन र टिमका खेलाडीलाई बल उपलब्ध दिलाउन माहिर मानिन्थे । हाल प्रशिक्षक रहेका हिएरो शारीरिकरुपमा समेत अब्बल खेलाडी थिए ।
सन् १९८९ मा रियल आएका हिएरोले २००३ रियल छाडेका थिए । तर, रियलमा जति रहे उनले आफुलाई फरक डिफेन्डर रहेको प्रमाणित गरे ।
सन् २००३ मा रियल छाडेर कतारी क्लब अल रायन गएका हिएरोले रियलबाट तीन युरोपियन कप, दुई इन्टर कन्टिनेन्टल कप, एक युरोपियन सुपर कप, पाँच ला–लिगा, एक कोपा डेल रे र चार स्पेनिस सुपर कप जितेका थिए ।
एजेन्सीको सहयोगमा
