एजेन्सी । फ्रेन्च लिग वान फुटबलमा शीर्ष स्थानको पेरिस सेन्ट जर्मेन (पिएसजी) बराबरीमा रोकिएको छ । आइतबार राति भएको खेलमा पिएसजी बोर्डोसंग २ - २ गोलको बराबरीमा रोकिएको हो ।
बोर्डोको मैदानमा नेयमार र केलियन एमबाप्पेले गोल गरेपनि पिएसजीले बराबरी खेल्दै अंक बाडेको हो । बोर्डोका जीमी ब्रान्ड र आन्द्रियास कोर्निलसले एक एक गोल गरे ।
खेलमा सुरुवाती अग्रता भने पिएसजीले बनाएको थियो । ३४ औं मिनेटमा नेयमारको गोलबाट पिएसजीले अग्रता बनाएको थियो । तर, ५३ औं मिनेटमा ब्रान्डले गोल गर्दै घरेलु टोलीलाई खेलमा फर्काए ।
खेलको ६६ औं मिनेटमा एमबाप्पेले गोल गर्दै पुनः पिएसजीलाई २ - १ को अग्रता दिलाए । तर, खेलको ८४ औं मिनेटमा बोर्डोका कोर्निलसले गोल गर्दै खेल २ - २ को बराबरीमा ल्याउदै पिएसजीसंग अंक खोस्न सफल भएको छ ।
यो बराबरीसंगै पिएसजीको विजयी यात्रामा पूर्णविराम लागेको छ । पिएसजी पछिल्लो १४ खेलमा जित निकालेको थियो । १५ औं खेलमा भने पिएसजी बराबरीमा रोकिएको छ ।
यो बराबरीसंगै शीर्ष स्थानको पिएसजीले १५ खेलबाट ४३ अंक जोडेको छ । पिएसजी दोस्रो स्थानको मोन्टपिलेर भन्दा १४ अंकले अघि छ । बोर्डो १८ अंक जोडेर ११ औं स्थानमा छ ।
