एजेन्सी । इंग्लिश प्रिमियर लिग फुटबलमा आज (आइतबार) तीन खेल संचालन हुँदैछ । प्रिमियर लिगमा आज ठुला क्लबहरु लिभरपुल, चेल्सी, आर्सनल, टोटेनहम लगायतका क्लबले प्रतिस्पर्धा गर्नेछन् ।
प्रिमियर लिग अन्तर्गत आज बेलुका चेल्सीले फुलहमको सामना गर्दैछ । चेल्सी र फुलहमबीचको खेल नेपाली समय अनुसार बेलुका ५:४५ मा सुरु हुनेछ । खेल चेल्सीको मैदानमा हुनेछ ।
रेलिगेसन जोनको फुलहमविरुद्ध चेल्सी सहज जितको अपेक्षासहित मैदान उत्रने छ । र, चेल्सी लिगको तेस्रो स्थानमा उक्लन चाहन्छ । यता, फुलहम भने चेल्सीलाई हराएर अप्रत्याशित जितको खोजीमा हुनेछ ।
लिगमा २८ अंक जोडेको चेल्सी चौथो स्थानमा छ । पुछारको फुलहमको ८ अंक छ ।
यस्तै लण्डन डर्बीमा आर्सनलले घरेलु मैदानमा टोटेनहमको सामना गर्दैछ । आर्सनल र टोटेनहमबीचको खेल ७:५० मा सुरु हुनेछ ।
घरेलु मैदानमा टोटेनहमविरुद्ध आर्सनल जित निकाल्दै शीर्ष तीन भित्र अटाउने लक्ष्यमा हुनेछ । यता, टोटेनहम आर्सनललाई हराएर दोस्रो स्थानमा उक्लने योजनामा हुनेछ । त्यसैले दुई टोलीबीचको खेल रोमान्चक हुने अनुमान गरिएको छ ।
लिगमा आर्सनलले २७ अनक जोडेको छ । र, लिगको पाँचौ स्थानमा छ । ३० अंक जोडेको टोटेनहम तेस्रो स्थानमा छ ।
लिग अन्तर्गत नै आज दोस्रो स्थानको लिभरपुलले एभर्टनको समान गर्दैछ ।
लिभरपुलको मैदानमा हुने दुई टोलीबीचको खेल ८ बजे सुरु हुनेछ । घरेलु मैदानमा लिभरपुल ३ अंक जोड्दै शीर्ष स्थानको म्यानचेस्टर सिटीसंगको अंक दुरी कम गर्न चाहन्छ ।
लिभरपुलले ३३ अंक जोडेको छ । र, लिगको दोस्रो स्थानमा छ । सिटीको ३८ अंक छ । यस्तै २२ अंक जोडेर छैटौं स्थानको एभर्टन लिभरपुलविरुद्ध अंक खोस्दै तालिका सुधार गर्न चाहन्छ ।
