एजेन्सी । इंग्लिश प्रिमियर लिग फुटबलमा आज (शनिबार) ६ खेलहरु संचालन हुँदैछ । प्रिमियर लिगमा शीर्ष क्लब म्यानचेस्टर सिटी, म्यानचेस्टर युनाइटेड जस्ता ठुला टिमको खेलहरु हुनेछ ।
प्रिमियर लिगमा आज साबिकको विजेता तथा लिग लिडर म्यानचेस्टर सिटीले घरेलु मैदानमा बर्नेमाउथको सामना गर्दैछ । सिटी र बर्नेमाउथबीचको खेल नेपाली समय अनुसार राति ८:४५ मा सुरु हुनेछ ।
बर्नेमाउथविरुद्ध मैदान उत्रदा सिटी जित निकाल्दै लिगमा आफ्नो अग्रता कायम राख्न चाहन्छ । बर्नेमाउथ सिटीलाई उसैको मैदानमा स्तब्ध बनाउने योजनामा हुनेछ ।
लिग लिडर सिटीले १३ खेलबाट ३५ अंक जोडेको छ । सिटी लिगमा अपराजित रहेको छ । यस्तै आठौं स्थानको बर्नेमाउथले २० अंक जोडेको छ ।
यस्तै म्यानचेस्टर युनाइटेडले रेलिगेसन जोनको साउथह्याम्पटनसंग उसैको मैदानमा खेल्दैछ । खेल ९:१५ मा सुरु हुनेछ ।
यस सिजन उत्कृष्ट प्रदर्शन गर्न नसकिरहेको युनाइटेड साउथह्याम्पटनलाई हराएर शीर्ष क्लबसंगको अंक दुरी कम गर्ने लक्ष्यमा हुनेछ ।
युनाइटेड २१ अंक जोडेर लिगको सातौं स्थानमा छ । साउथह्याम्पटन भने ८ अंक जोडेर पुछारबाट दोस्रो स्थानमा छ ।
लिग अन्तर्गत नै आज अन्य खेलमा लेष्टर सिटीले वाट्फोर्ड, क्रिष्टल प्यालेसले बर्नली, हडर्सफिल्डले ब्राइटन तथा न्युकासलले वेष्टह्यामविरुद्ध खेल्नेछ । सबै खेल राति ८:४५ मा सुरु हुनेछ ।
