काठमाडौं । युएईमा जारी टी–१० क्रिकेट लिग अन्तर्गत सन्दीप लामिछानेले खर्चिलो बलिङ गरेका छन् । चौथो ओभर बलिङ गर्न आएका सन्दीपले विना विकेट २२ रन खर्चेका छन् ।
सन्दीपसम्मिलित केरला किंग्सले जितका लागि वारिवर्सलाई १ सय २ रनको लक्ष्य प्रस्तुत गरेको छ । शारजाह क्रिकेट स्टेडियममा पहिले ब्याटिङ गरेको केरला किंग्सले निर्धारित ओभरमा २ विकेट गुमाएर १ सय १ रन बनाएको थियो ।
पाउल स्टर्लिङले ६० र इयान मोर्गानले १७ रन बनाएका थिए । क्रिस गेल १४ रनमा आउट भएका थिए ।
यसअघि, सन्दीपले पहिलो खेलमा पख्तुनविरुद्ध २ ओभर बलिङ गर्दै १७ रन खर्चेर ३ विकेट लिएका थिए । र, उनी प्लेयर अफ दि म्याच समेत बनेका थिए ।
दोस्रो खेलमा सन्दीपले २ ओभर बलिङ गर्दै १४ रन खर्चिएर १ विकेट लिएका थिए । तेस्रो खेलमा सन्दीपले राजपुट्सविरुद्ध २ ओभर बलिङ गर्दै २३ रन खर्चेर २ विकेट लिएका थिए ।
पञ्जावविरुद्वको चौथो खेलमा उनले २ ओभर बलिङ गर्दै विना विकेट २८ रन खर्चेका थिए ।
