काठमाडौं । नेपाली राष्ट्रिय टोलीका सदस्य सन्दीप लामिछाने रहेको केरला किङसले युएईमा जारी टी-१० क्रिकेट लिग अन्तर्गतको तेस्रो खेलमा अहिले राजपुट्ससंग प्रतिस्पर्धा गरिरहेको छ ।
सारजाहमा जारी खेलमा केरलाले टस जितेर पहिले फिल्डिङ रोजेको छ । टस हारेर पहिले ब्याटिङ गरिरहेको राजपुट्सले ९ ओभर सकिदा ५ विकेट गुमाएर ९४ रन जोडेको छ । र, अहिले वर्षाको कारण खेल रोकिएको छ ।
जारी खेलमा नेपालका सन्दीप लामिछानेले उत्कृष्ट प्रदर्शनलाई निरन्तरता दिएको छ । सन्दीपले २ ओभर बलिङ गर्दै २३ रन खर्चेर २ विकेट लिए । सन्दीपले आफ्नो पहिलो ओभरमा विकेट लिन सफल भएका छन् । सन्दीपले मोहमद साहजादलाई १ रनमा आउट गरे ।
यस्तै सन्दीपले आफ्नो दोस्रो ओभरमा समेत विकेट लिन सफल भएका छन् । सन्दीपले कार्लोस ब्रेथवेथलाई १ रनमा आउट गरे ।
सन्दीपले पहिलो खेलमा पख्तुनविरुद्ध २ ओभर बलिङ गर्दै १७ रन खर्चेर ३ विकेट लिएका थिए । र, उनी प्लेयर अफ दि म्याच समेत बनेका थिए ।
दोस्रो खेलमा सन्दीपले २ ओभर बलिङ गर्दै १४ रन खर्चिएर १ विकेट लिएका थिए । सन्दीपले ३ खेलबाट ६ विकेट लिईसकेका छन् ।
