काठमाडौं । विभागीय टिम त्रिभुवन आर्मी क्लबका स्ट्राइकर जर्ज प्रिन्स कार्कीले पल्सर सहिद स्मारक 'ए' डिभिजन लिगका बाँकी खेलहरु गुमाउने भएका छन् ।
नेपाली राष्ट्रिय टोलीका सदस्य समेत रहेका कार्कीले आर्मीको तालिममा जानु पर्ने भएको कारण लिग गुमाउने भएका हुन् ।
नेपाली सेनाका सेकेन्ड लेफ्टिनेन्ट कार्कीको बढुवा भएको र तालिमका लागि जानु परेको कारण लिगबाहिर रहने आर्मीका प्रशिक्षक नविन न्यौपानेले बताए ।
आर्मीले लिगको चौथो चरणको खेलमा सोमबार संकटा क्लबसंग खेल्दैछ । उक्त खेलमा कार्की उपस्थित हुनेछैन ।
'जर्ज प्रिन्स कार्की आफ्नो भविष्य बनाउन लागेको छ । आर्मीको प्रमोसनमा भएकाले लिगका बाँकि खेल खेल्न पाउने अवस्था छैन ।' संकटासंगको खेलअघि प्रशिक्षक न्यौपानेले भने ।
यसअघि स्ट्राइकर कार्कीले न्युरोड टिम एनआरटीविरुद्ध खेलेका थिए । तर, च्यासल युथ क्लब र नेपाल पुलिसविरुद्धको खेलमा भने कार्की टिममा थिएनन् ।
यस्तै प्रशिक्षक न्यौपानेले संकटाविरुद्ध अर्का स्ट्राइकर नवयुग श्रेष्ठ घाइते भएका कारण नखेल्ने बताए । उनले दोहोरो पहेलो कार्डको कारण सुमन अर्याल पनि टिममा नहुने बताए ।