काठमाडौं । पहिलो संकरणको दक्षिण एसियाली शारीरिक सुगठन प्रतियोगिता शुक्रबारबाट काठमाडौंमा सुरु हुने भएको छ ।
आयोजक नेप्लिज फेडेरसन अफ बडी बिल्डिङ एण्ड फिटनेसले मंगलबार पत्रकार सम्मेलन गर्दै प्रतियोगिता मंसिर ७ बाट ९ गतेसम्म संचालन हुने जानकारी गराएको हो ।
प्रतियोगितामा दक्षिण एसियाका आठ राष्ट्रहरु नेपाल, भारत, बंगलादेश, भुटान, श्रीलंका, पाकिस्तान, अफगानिस्तान र माल्दिभ्सका खेलाडीहरुले प्रतिस्पर्धा गर्ने छन् । जसमा करिब १ सय महिला र पुरुष खेलाडीको उपस्थिति रहने आयोजकले जनाएको छ ।
प्रतियोगितामा पुरुष बडी बिल्डिङ, पुरुष फिजिक्स, महिला फिटनेस र महिला फिजिस्कमा प्रतिस्पर्धा हुनेछ ।
पुरुष बडी बिल्डिङतर्फ ६० केजी तौल, ६५ केजी , ७० केजी ,७५ केजी, ८० केजी, ८५ केजी र ८५ केजी माथि तौल समूहमा प्रतिस्पर्धा हुनेछ ।
महिला फिटनेस खुल्ला तौल समूहको हुनेछ ।
नेपालमा पहिलोपटक हुन लागेको प्रतियोगिताबाट नेपाली खेलाडीले अन्तर्राष्ट्रिय पहिचान र लोकप्रियता पाउने आयोजकले विश्वास लिएको छ ।
कार्यक्रमको दौरान साउथ एसियन फेडेरेसन अफ फिटनेसको संस्थापक कार्यसमितिको चयन गरिने आयोजकले जनाएको छ ।