भेट्रान फुटबल च्याम्पियनसिप सिएमजीले खेल्ने

गृहपृष्ठ
फुटबल

मंगलबार, कात्तिक २७, २०७५ खेलपाटी संवाददाता

काठमाडौं । सिएमजी क्लबले भारतको गुवाहाटीमा आयोजना हुने पाँचौं अन्तराष्ट्रिय भेट्रान फुटबल च्याम्पियनसिपमा प्रतिस्पर्धा गर्ने भएका छन् ।

युनाइटेड ब्रदर्स क्लबको आयोजनामा हुने च्याम्पियनसिप कार्तिक २९ गतेदेखि मंसिर २ सम्म आयोजना हुनेछ । च्याम्पियनसिपमा भारतको मनिपुर, भुटान, कोलकत्ता, बंगलादेश, नयाँ दिल्लीका क्लबहरुले प्रतिस्पर्धा गर्नेछन् ।

च्याम्पियनसिपमा सिएमजी अखिल नेपाल फुटबल संघ एन्फाका उपाध्यक्ष, पूर्व राष्ट्रिय फुटबल टिमका कप्तान तथा गोलकिपर उपेन्द्रमान सिंहको नेतृत्वमा मैदान उत्रने छन् । सिएमजीको टिममा नेपाल राष्ट्रिय फुटबल टोलीका प्रशिक्षक बाल गोपाल महर्जन पनि रहेका छन् । यस्तै सिएमजीको टोलीमा नेपाली राष्ट्रिय टोलीबाट खेलिसकेका पुर्व खेलाडीहरु रहेका छन् ।

च्याम्पियनसिपका लागि सिएमजी क्लबका २० सदस्यीय भेट्रान टोली बुधबार त्यसतर्फ प्रस्थान गर्ने भएका छन् । सिएमजी टोलीलाई मंगलबार क्लबले विदाई गरेको थियो । च्याम्पियनसिपमा जाने टोलीलाई पल्सर शहिद स्मारक 'ए' डिभिजन लिगका संयोजक तथा क्लबका प्रबन्ध निर्देशक पुर्व सांसद नरेन्द्र शाहले बिदाई गरे ।

विदाई कार्यक्रममा बोल्दै कप्तान सिंहले टोलीको तयारी राम्रो रहेको कारण उपाधि जितेर फर्कने बताए ।

'हाम्रो मुख्य लक्ष्य शिल्ड उठाउने हो । तयारी राम्रो गरेका छौँ,' कप्तान सिंहले भने, 'नेपालको युथ टिम, महिला टिमसँग लगातार अभ्यास खेल खेलका छौँ । नतीजा राम्रो आउँछ ।'

च्याम्पियनसिपको विजेताले ५० हजार भारतीय रुपैया पाउने छन् । यस्तै उपविजेताले ३० हजार प्राप्त गर्नेछन् । त्यस्तै प्रतियोगिताको उत्कृष्ट खेलाडी, उत्कृष्ट गोलकिपर र सर्वाधिक गोलकर्ता पनि पुरस्कृत हुनेछन् ।

सिएमजी नेपाली भेट्रान टिम :

उपेन्द्रमान सिंह (कप्तान)

राजेश मानन्धर

बाल गोपाल महर्जन

राकेश श्रेष्ठ

नविन पाण्डे

दिनेश ब्यञ्जनकार

चेत नारायण श्रेष्ठ

शुक्र तामाङ

रविन मान ब्यञ्जनकार

विजय श्रेष्ठ

अष्ट कुमार कावे
सुविन शाक्य