काठमाडौं । नेपाली फुटबलको महारथी क्लब हो, मनाङ मस्र्याङ्दी क्लब । राजधानी वा मोफसल हरेक प्रतियोगितामा मनाङ उपाधिको दाबेदार हो । नेपाली फुटबलको सर्वाधिक सफल क्लब मनाङबाट फुटबल खेल्ने हरेक खेलाडीको सपना हुन्छ ।
तर ललितपुरमा चलिरहेको ललित स्मृति अन्डर १८ फुटबल च्याम्पियनसिपमा मनाङको प्रर्दशन र नतिजा नाम अनुसारको छैन । प्रतियोगिताको पहिलो खेलमा थ्रीस्टारसंग १–० ले स्तब्ध भएको मनाङ दोस्रो खेलमा सुदुरपश्चिम फुटबल क्लबसंग ४–२ ले स्तब्ध भयो । मनाङले अब पनि खेलमा फर्कने प्रयास गरेन भने उ प्रतियोगिताबाट बाहिरिने पक्का छ, समिकरणले त्यस्तै भन्छ । समुह चरणको शुन्य अंक सहित मनाङ तालिकाको पुछारमा छ ।
के मनाङ खेलमा फर्केला त ?
त्यसको लागि आज हिमालयन शेर्पासंग उसको खेल हेर्नुपर्ने हुन्छ । प्रतियोगिताको १६ औ खेलमा मनाङले हिमालयन शेर्पा क्लबसंग खेल्दैछ । सोही खेलको नतिजाले समुह डीबाट अघिल्लो चरण प्रवेश गर्ने टोलीको लगभग टुङ्गो लगाउनेछ । खेल सातदोबाटोस्थित एन्फा कम्प्लेक्समा अपरान्ह ४ बजे सुरु हुनेछ ।
