एजेन्सी । इंग्लिश प्रिमियर लिग फुटबलमा म्यानचेस्टर युनाइटेडले जित हासिल गरेको छ । शनिबार भएको खेलमा युनाइटेडले बर्नेमाउथलाई २ - १ ले हराएको हो ।
बर्नेमाउथको मैदानमा १ - ० ले पछि परेको स्थिति उल्टाएर युनाइटेडले महत्वपूर्ण ३ अंक जोडेको हो । युनाइटेडको जितमा एन्थोनी मार्सियल र मार्कुस राष्फोर्डले एक एक गोल गरे । बर्नेमाउथका एक गोल कलुम विल्सनले गरे ।
खेलमा सुरुवाती अग्रता घरेलु टोलीले लिएको थियो । खेलको ११ औं मिनेटमा विल्सनले गोल गर्दै बर्नेमाउथलाई १ - ० को अग्रता दिलाए । तर, मार्सियल र राष्फोर्डले गोल गर्दै युनाइटेडको उद्दार गरेका थिए ।
खेलको ३५ औं मिनेटमा मार्सियलले गोल गर्दै खेल १ - १ को बराबरीमा ल्याए । त्यसपछि इन्जुरी समयमा दृश्यमा आए राष्फोर्ड । इन्जुरी समयको तेस्रो मिनेटमा राष्फोर्डले गोल गर्दै युनाइटेडलाई २ - १ को महत्वपूर्ण जित दिलाए ।
जितसंगै युनाइटेडले ११ खेलबाट २० अंक जोडेको छ । र, युनाइटेड आठौं स्थानमा उक्लिएको छ । पराजित बर्नेमाउथ २० अंकसहित छैटौं स्थानमा छ ।
-(1)-1736156467.jpeg)
