काठमाडौं । जापानमा हुने ओलम्पिक खेलकुदका लागि छनोटको तयारीमा रहेको नेपाली राष्ट्रिय महिला फुटबल टोलीले चीनमा भएको अन्तिम मैत्रीपूर्ण खेलमा हार व्यहोरेको छ ।
बुधबार भएको खेलमा नेपाल बेईजिङ फोनिक्स महिला टिमसंग २ - १ ले पराजित भएको हो । नेपालका लागि सावित्रा भण्डारीले एक गोल गरेपनि टोलीलाई जित दिलाउन सकिनन् ।
बेईजिङ फोनिक्ससंग नेपालको लगातार दोस्रो हार हो । सोमबार भएको पहिलो खेलमा नेपाल फोनिक्ससंगै ४ - १ ले पराजित भएको थियो । तर, नेपालले मंगलबार बेईजिङ स्पोर्टस युनिभर्सिटीलाई ३ - ० ले हराएको थियो ।
अन्तिम मैत्रीपूर्ण खेलसंगै अब नेपाली टिम ओलम्पिक छनोट खेल्न म्यानमार जाने अखिल नेपाल फुटबल संघ (एन्फा) ले जनाएको छ ।
ओलम्पिकका लागि एसिया छनोटमा नेपाल समूह 'सी' मा रहेको छ । नेपालको समूहमा भारत, बंगलादेश र म्यानमार रहेका छन् ।
नेपालले नोभेम्बर ८ मा भारत, ११ मा म्यानमार र १३ मा बंगलादेशसंग खेल्नेछन् ।
ओलम्पिकका लागि पहिलो चरणमा एसियाबाट १८ टोलीले प्रतिस्पर्धा गर्दैछन् । समूह 'ए' र 'बी' मा पाँच पाँच राष्ट्र रहेको छ भने समूह 'सी' र 'डी' मा चार चार टोली रहेका छन् ।
प्रत्येक समूहका बिजेता र उपविजेताले दोस्रो चरणको छनोटमा स्थान बनाउनेछन् । यस्तै तेस्रो हुनेमा उत्कृष्ट दुईले समेत दोस्रो चरणको यात्रा तय गर्नेछन् ।