काठमाडौं । चौथो संस्करणको यू-१५ साफ च्याम्पियनसिप काठमाडौंमा चलिरहेको छ । आयोजक नेपाल, भारत, बङ्गलादेश, पाकिस्तान, माल्दिभ्स र भुटान गरी प्रतियोगितामा ६ राष्ट्र सहभागी छन् । अन्तिम समयमा आएर श्रीलङ्काले प्रतियोगिता नखेल्ने निर्णय गरेको थियो । गत विहिबार सुरु भएको प्रतियोगिताको समूह चरणका खेल सकिएका छन् ।
समूह चरणका खेल सकिदाँ दुई राष्ट्र अपराजित रहे । प्रतियोगितामा बलियो मानिएको बङ्गलादेश र पाकिस्तानले आफुलाई अपराजित राखे । बङ्गलादेश एक पटकको उपाधि विजेता समेत हो । उसले प्रतियोगितालाई लिएर विशेष तयारी गरेको थियो ।
प्रतियोगिताको अघिल्लो दिन बङ्गलादेशका प्रशिक्षक मुस्तोफा अन्वार पर्भेजले भनेका थिए, ‘हाम्रो मुख्य लक्ष्य भनेको पहिला सेमिफाइनल हो । आयोजक नेपाल र भारत प्रतियोगिता दाबेदार हो । तर हामी दुवै टिमलाई टक्कर दिएर उपाधि जित्ने कोशिश गर्छाै ।’
उपाधि दाबेदारको रुपमा मानिएका आयोजक नेपाल र भारत प्रतियोगिताको एक एक खेलमा मात्र जित निकाल्न सफल भए । भुटान र माल्दिभ्स एक गोल नगरी प्रतियोगिताबाट बाहिरिए । हेरौं यस प्रतियोगितामा सेमिफार्इनल पुगेका टाेलीकाे समूह चरणकाे प्रर्दशन ।
बङ्गलादेश :
बंङ्गलादेशले प्रतियोगिताको समूह चरणका खेलमा शतप्रतिशत जित हासिल गर्याे । उसले समूह चरणका दुबै खेल आफ्नो पक्षमा पार्याे । पहिलो खेलमा माल्दिभ्सलाई ९–० को गोल अन्तरले पराजित गरेको उसले दोस्रो खेलमा आयोजक नेपाललाई २–० गोल अन्तरले हरायो । पहिलो खेलमा बङ्गलादेशका निहत जमन उच्चासले ह्याट्रिक गरेको थिए । उनी प्रतियोगितका सर्वाधिक गोलकर्ता हुन् । उनको नाममा ४ गोल छ ।
त्यस्तै दोस्रो खेलमा उसले आयोजक नेपाललाई पराजित गर्याे । खेल सुरु भएको तेस्रो मिनेटमा उसले अग्रता बनाएको थियो । खेलको ३३ मिनेटमा बङ्गलादेशका गोलकिपर मितुल मर्मा नेपाली खेलाडीलाई डिबक्स भित्र फल गरेपछि रातो कार्ड खादैँ मैदान बाहिरिएका थिए । बाकी समय बङ्गलादेश १० खेलाडीमा सिमित रह्यो । त्यसपछि पनि उसले खेलमा आफ्नो प्रभुत्व राख्यो र खेल आफ्नो पक्षमा पार्न सफल भयो ।
प्रतियोगितमा बङ्गलादेशका इब्नि अहद र अशिकुर रहमान र रसेल अहमेदको नाममा दुई दुई गोल रहेको छ । यस प्रतियोगिता बङ्गलादेशलाई खेलाडीहरुको उचाईले पनि साथ दिएको छ । त्यसको प्रत्यक्ष फाईदा बंगलादेशलाई छ । दोस्रो खेलमा उसका तीन डिफेन्डर हेलाल अहमेद, रविउल अलाम र रस्तोम इस्लामले एयर बल मिस हुनै दिएनन् । बंगलादेश खेलाडी शारिरिक तथा प्राविधिक रुपमा बलियो देखिन सकिन्छ ।
पाकिस्तानः
साफ च्याम्पियनसिप प्रतियोगिताको दोस्रो अपराजित र सरप्राईज टोलि हो, पाकिस्तान । उसले प्रतियोगिताको समूह चरणको खेलमा शतप्रतिशत जित निकाल्यो । प्रतियोगिताको पहिलो खेलमा पाकिस्तानले चिरपरिचित भारतलाई २–१ गोल अन्तरले पराजित गर्याे । उसले दोस्रो खेलमा भुटानलाई ४–० गोल अन्तरले पराजित ग¥यो ।
प्रतियोगितामा एक मात्रै विदेशी प्रशिक्षक राख्ने टिम पाकिस्तान हो ।
उसलाई ब्राजिलियन रोबेर्टाे पोर्टेल्लाले प्रशिक्षण दिईरहेका छन् । पाकिस्तानी खेलाडी शारिरिक रुपमा पुरै फिट रहेका छन् । उसले पहिलो खेलमा भारतविरुद्ध आक्रामक खेल पस्केको थियो । एक हिसावले ब्राजिलियन प्रशिक्षकले प्रतियोगितामा आफ्नो रणनिती सफल बनाएका छन् । त्यस्तै उसले प्रतियोगिताको दोस्रो खेलमा भुटानविरुद्ध सजिलै जित निकालेको थियो । पहिलो हाफमै ४–० को अग्रता लिएको पाकिस्तानले दोस्रो हाफमा भने सोचेको प्रदर्शन गर्न सकेन ।
नेपाल :
यु–१५ साफ च्याम्पियनसिको आयोजक राष्ट्र हो नेपाल । आयोजकसँगै घरेलु समर्थकको हिसाबले आयोजकलाई सधै प्रतियोगिताको उपाधि विजेताको रुपमा हेरिन्छ । नेपाल साफ प्रतियोगिताको दुई पटकको उपविजेता समेत हो । प्रतियोगितामा नेपालले सोचेको जस्तो खेल्न सकिरहेको छैन । पहिलो खेलमा माल्दिभ्स विरुद्ध ४–० को जित निकाले पनि नेपाली खेलाडीले क्षमता अनुसारको प्रर्दशन गर्न सकेका छैनन् ।
सुरुवाती खेलमा नेपाली टिमले बारम्बार गोल गर्ने सुनौला अवसर चुकाएका थिए । माल्दिभ्सविरुद्ध नेपाली खेलाडी टिम गेम खेल्न बिर्सिएका छन् । नेपालको पहिलो दिनको खेलको रक्षापंक्ति र अग्रपंक्तिले खासै गतिलो खेल्न सकेको थिएन । रक्षापंक्तिमा सामान्य गल्ती धेरै पटक दोहरिएको थियो । अग्रपंक्तिमा खेलाडी टिम गेम भन्दा ब्यक्ति विशेषमा केन्द्रित रहेका थिए ।
दोस्रो खेलमा बङ्गलादेशविरुद्ध नेपाली टिम समालिन सकेन । बंगलादेशले दुवै गोल नेपाली टिम समालिन नपाउदै गरेको थियो । पहिलो गोल खेल सुरु भएको तेस्रो मिनेटमै गरेको बंगलादेशले दोस्राे गोल दोसो हाफको पहिलो मिनेटमै गरेको थियो । पहिलो हाफको ३३ औँ मिनेटमा बङ्गलादेश १० खेलाडीमा सिमित भएपनि नेपाल खेलमा फर्किन सकेन । बंगलादेशविरुद्व नेपाली टिम डिफेन्स र अग्रपंक्तिमा चुकेको थियो । खेलपछि नेपाली टिमका प्रशिक्षक सनोज श्रेष्ठले सेमिफाईनलमा समुह चरणको गल्ती नदोहरिने बताएका थिए ।
भारतः
साफ यु–१५ चौथो संस्करणमा आइपुग्दा दुई पटकको विजेता राष्ट्र हो भारत । तर भातरले यसपटक भने राम्रो खेल्न सकेको छैन । प्रतियोगिताको बलियो भारत पहिलो खेलमै पाकिस्तानसंग हार्न पुगेको थियो । पहिलो खेलमा भारतको कुनै पक्षपनि सवल देखिएन । मुख्य रुपमा भारतीय टिम पहिलो खेलमा आउन्टर खेलमा चुक्न पुग्यो ।
त्यस्तै दोस्रो खेलमा भारतले भुटानमाथि ४–० को जित दर्ता गर्याे ।
उसले सेमिफाइनल सम्मको यात्रा गर्न धेरै दुख भोग्नुपर्यो । भुटानविरुद्ध पनि उसले खासै राम्रो खेल पस्किन सकेन । भुटानविरुद्ध उसले गोल गर्न धेरै संघर्ष गर्नुपरेको थियो । पहिलो हाफमा उसले जम्मा एक गोल गर्न सकेको थियो ।
