एजेन्सी । इंग्लिश प्रिमियर लिग फुटबलमा चेल्सीले सहज जित निकालेको छ । आइतबार भएको खेलमा चेल्सीले बर्नलीलाई ४ - ० ले हराएको हो ।
बर्नलीको मैदानमा भएको खेलमा चेल्सीलाई जित दिलाउन अल्भारो मोरटा, रोस बार्क्ली, लफ्टस चिक र विलियनले समान एक एक गोल गरे ।
बर्नलीविरुद्ध एकतर्फी खेल खेलेको चेल्सीले २२ औं मिनेटमा मोरटाको गोलबाट अग्रता बनाएको थियो । खेलको ५७ औं मिनेटमा बार्क्लीले गोल गर्दै चेल्सीको अग्रता दोब्बर बनाए ।
खेलको ६३ औं मिनेटमा विलियनले गोल गर्दै चेल्सीलाई ३ - ० को अग्रता दिलाए । त्यसपछि खेलको इन्जुरी समयमा चिकले गोल गर्दै चेल्सीलाई ४ - ० को सहज जित दिलाए ।
जितसंगै चेल्सी लिगको दोस्रो स्थानमा उक्लिएको छ । चेल्सीले १० खेलबाट २४ अंक जोडेको छ । पराजित बर्नली ८ अंक जोडेर १५ औं स्थानमा छ ।
शीर्ष स्थानको लिभरपुलको २६ अंक छ । यस्तै तेस्रो स्थानको म्यानचेस्टर सिटीको २३ अंक छ ।
