काठमाडौं । सिन्धुपाल्चोकको बाह्रबिसेमा सम्पन्न प्रथम सेतीदेवी फुटबल प्रतियोगिताको उपाधि आयोजक सेतीदेवी युवा क्लबले जितेको छ ।
बाह्रबिसे नगरपालिकास्थित मान्द्रामा भएको फाइनलमा गाथी-६ लाई १ - ० गोल अन्तरले हराउदै सेतीदेवी च्याम्पियन बनेको हो ।
सेतीदेवीलाई उपाधि दिलाउन ग्याल्साङ्ग शेर्पाले निर्णायक गोल गरे । उपाधिसंगै सेतीदेवीले नगद ३० हजारसहित ट्रफी, मेडल र प्रमाणपत्र प्राप्त गरेका छन् ।
उपविजेता बनेको गाथीले २० हजार नगदसहित ट्रफी, मेडल र प्रमाणपत्र प्राप्त गरे । तेस्रो भएको भयोलिकुण्ड युवा क्लबले १० हजार नगद प्राप्त गर्यो ।
प्रतियोगितामा उत्कृष्ट खेलाडी आयोजकका ग्याल्साङ्ग शेर्पा, उत्कृष्ट गोलकिपर बुद्ध गुबाजु र उत्कृष्ट प्रशिक्षक वाङ्गच्युत शेर्पा घोषित भए ।
सेतीदेवी युवा क्लबको आयोजनामा भएको प्रतियोगिता १२ टोलीले प्रतिस्पर्धा गरेका थिए ।
