एजेन्सी । अन्तर्राष्ट्रिय मैत्रीपूर्ण फुटबलमा आज चिरपरिचित दुई प्रतिद्वन्द्वी ब्राजिल र अर्जेन्टिनाले प्रतिस्पर्धा गर्दैछन् । साउदी अरेबियाले आयोजना गरेको सुपर क्लासिको प्रतियोगिता अन्तर्गत ब्राजिल र अर्जेन्टिनाले खेल्न लागेको हो ।
साउदी अरेबियामा हुने ब्राजिल र अर्जेन्टिनाबीचको खेल नेपाली समय अनुसार राति ११:४५ मा सुरु हुनेछ । र, किङ अब्दुल्लाह स्पोर्ट्स सिटी मैदानमा दुई टोलीबीचको खेल निकै रोमान्चक हुने अपेक्षा गरिएको छ ।
दुवै टोली चौथो मैत्रीपूर्ण खेलका लागि मैदान उत्रन लागेका हुन् । यसअघि दुवै टोलीले ३/३ मैत्रीपूर्ण खेल खेलिसकेका छन् । चौथो मैत्रीपूर्णको लागि मैदान उत्रदा दुवै टोली जित निकाल्ने लक्ष्यसहित मैदान उत्रने छन् ।
ब्राजिलविरुद्ध अर्जेन्टिना लियोनल मेस्सी बिना मैदान उत्रने छन् । मेस्सीले विश्वकपपछि अर्जेन्टिनाबाट खेलेका छैनन् । त्यसैले ब्राजिलविरुद्ध अर्जेन्टिनालाई निकै कठिन हुने अनुमान गरिएको छ । तर, पाउल डीबाला जस्ता खेलाडी अर्जेन्टिनामा हुनेछ ।
यता, ब्राजिल विश्वकप खेलेको टोलीसहित मैदान उत्रने छन् । यस्तोमा नेयमार, फिलिपे कौटिन्हो, रोबर्टो फिर्मिन्हो, ग्राबियल जिसस जस्ता खेलाडी ब्राजिलसंग हुनेछन् ।
यसअघिको मैत्रीपूर्ण खेलमा ब्राजिलले अमेरिका, एल साल्भाडोर र साउदी अरेबियालाई हराएको थियो ।
यस्तै अर्जेन्टिनाले ग्वाटेमाला र इराकलाई पराजित गर्दा कोलम्बियासंग बराबरी खेलेको थियो ।
