एजेन्सी । इन्ग्लिश प्रिमियर लिग फुटबलमा म्यानचेस्टर युनाइटेडले संघर्षपूर्ण जित निकालेको छ । शनिबार राति भएको खेलमा युनाइटेडले न्युकासल युनाइटेडलाई ३ - २ ले हराएको हो ।
जोसे मोरिन्होको टिम युनाइटेडले २ गोलको अग्रता उल्टाएर महत्वपूर्ण जित निकालेको हो । घरेलु मैदानमा उत्कृष्ट पुनरागमन गरेको युनाइटेडका लागि हुवान माटा, एन्थोनी मार्सियल र एलेक्सिस सान्चेजले एक एक गोल गरे । न्युकासलका केनेडी र योसिनोरी मुटोले एक एक गोल गरे ।
ओल्ड ट्राफोर्डमा पहिलो हाफको १० मिनेटभित्र युनाइटेड २ - ० ले पछि परेको थियो । खेलको सातौं मिनेटमा केनेडीले गोल गर्दै न्युकासललाई सुरुवाती अग्रता दिलाए । १० औं मिनेटमा मुटोले गोल गर्दा पाहुना टोली २ - ० ले अघि रह्यो ।
तर, युनाइटेडले दोस्रो हाफमा उत्कृष्ट पुनरागमन गर्यो । खेलको ७० औं मिनेटमा युनाइटेडका माटाले गोल गर्दै खेल २ - १ मा ल्याए । ७६ औं मिनेटमा मार्सियलले गोल गर्दै खेल २ - २ को बराबरी बनाउन सफल भए । त्यसपछि खेलको ९० औं मिनेटमा सान्चेज नायक बने । उनले खेलको अन्तिम समयमा हेड गोल गर्दै युनाइटेडलाई महत्वपूर्ण जित दिलाए ।
जितसंगै खराब लयमा गुज्रिरहेको युनाइटेडको लागि राहत मिलेको छ । यस्तै प्रशिक्षक मोरिन्होमाथि समेत दबाब केहि कम भएको छ ।
जितपछि युनाइटेडले ८ खेलबाट १३ अंक जोडेर लिगको आठौं स्थानमा उक्लिएको छ । पराजित न्युकासल २ अंक जोडेर अन्तिमबाट दोस्रो स्थानमा छ ।
-1735138694.jpeg)
-1735136879.JPG)
