एजेन्सी । युरोपा लिग फूटबल अन्तर्गत समूह चरणको दोस्रो खेलमा इन्ग्लिश क्लब आर्सनलले सहज जित निकालेको छ । बिहिबार राति भएको खेलमा आर्सनलले अजरबैजानको क्वाराबागलाई ३ - ० ले हराएको हो ।
अधिकांस दोस्रो रोजाईका खेलाडीसहित मैदान उत्रेको आर्सनलले क्वाराबागलाई उसैको मैदानमा हराएको हो । आर्सनलको जितमा सोक्रटिस पापस्थोपौलोस, इमली स्मिथ रोवे र माट्टेओ गुएनडोजीले एक एक गोल गरे ।
क्वाराबागविरुद्ध सहज जित निकाल्न आर्सनलले खेलको पाँचौ मिनेटमा सोक्रटिसले गोलबाट अग्रता बनाएको थियो । ५३ औं मिनेटमा इमलीले गोल गर्दा आर्सनल २ - ० ले अघि रह्यो । इमलीको यो युरोपा लिगमा डेब्यु गोल समेत हो ।
त्यसपछि खेलको ८० औं मिनेटमा गुएनडोजीले गोल गर्दै आर्सनललाई ३ - ० को जित दिलाए ।
जितसंगै समूह 'ई' को आर्सनलले २ खेलबाट ६ अंक जोडेको छ । र, तालिकाको शीर्ष स्थानमा छ । क्वाराबाग अंकबिहिन रहेको छ ।
यस समूहको अर्को खेलमा पोर्चुगलको स्पोर्टिङ लिस्बोनले युक्रेनको भोर्स्क्लालाई २ - १ ले हराएर दोस्रो जित निकालेको छ । स्पोर्टिङ ६ अंक जोडेर दोस्रो स्थानमा छ । भोर्स्क्ला अंक बिहिन रहेको छ ।
