एजेन्सी । स्पेनिस ला लिगा फुटबलमा साबिकको विजेता बार्सिलोना बराबरीमा रोकिएको छ । शनिबार भएको खेलमा बार्सिलोना एट्लेटिको बिल्बाओसंग १ - १ गोलको बराबरीमा रोकिएको हो ।
शीर्ष स्थानको बार्सिलोना घरेलु मैदानमै बिल्बाओसंग बराबरीमा रोकिएको हो । तर, बार्सिलोनाले एक गोलले पछि परेको स्थिति उल्टाएर बराबरी खेलेको थियो ।
बार्सिलोनालाई हारबाट जोगाउन मुनिर अल हदादीले खेलको ८४ औं मिनेटमा गोल गरेका थिए । त्यसअघि खेलको ४१ औं मिनेटमा ओस्कार डी मार्कुसले गोल गर्दै बिल्बाओलाई सुरुवाती अग्रता दिलाएका थिए । तर, बिल्बाओ अन्तिम १० मिनेट सम्हालिन नसक्दा बार्सिलोनाले एक अंक पाएको हो ।
यो बराबरीपछि पनि बार्सिलोनाले शीर्ष स्थान कायम राखेको छ । बार्सिलोनाले ७ खेलबाट १४ अंक जोडेको छ । बिल्बाओ ६ खेलबाट ७ अंक जोडेर १४ औं स्थानमा छ ।
ला लिगा अन्तर्गत शनिबार भ्यालेन्सियाले रियल सोडीडाडलाई १ - ० ले हराएको छ ।