एजेन्सी । आर्सनल काराबाओ (इएफएल) कप फुटबलको चौथो चरणमा प्रवेश गरेको छ । बुधबार राति भएको खेलमा च्याम्पियनसिप क्लब ब्रेन्टफोर्डलाई ३ - १ ले हराएर आर्सनल चौथो चरणमा पुगेको हो ।
घरेलु मैदानमा आर्सनललाई जित दिलाउन ड्यानी वेलब्याकले दुई गोल गरे । यस्तै एलेक्सजेन्डर लाकाजेट्सले एक गोल गरे । ब्रेन्टफोर्डका एलेन जजले एक गोल फर्काए ।
इमिरेट्स स्टेडियममा खेलको पाँचौ मिनेटमा वेलब्याकले गोल गर्दै आर्सनललाई सुरुवाती अग्रता दिलाएका थिए । खेलको ३७ औं मिनेटमा वेलब्याकले व्यक्तिगत दोस्रो गोल गर्दा पहिलो हाफमा आर्सनल २ - ० ले अघि रह्यो ।
दोस्रो हाफमा ब्रेन्टफोर्ड खेलमा फर्कने कोशिश गर्यो । खेलको ५८ औं मिनेटमा जजले गोल गर्दै खेल २ - १ को स्थितिमा ल्याए । तर, खेलको अन्तिम समयमा लाकाजेट्सले गोल गर्दै आर्सनललाई ३ - १ को जित दिलाए ।
यस्तै टोटेनहमले पनि चौथो चरणमा स्थान बनाएको छ । वाट्फोर्डसंग २ - २ गोलको बराबरी खेलेको टोटेनहमले पेनाल्टी सुटआउटमा ४ - २ को जित निकाल्दै चौथो चरणमा स्थान पक्का गरेको हो ।
