एजेन्सी । म्यान्चेष्टर युनाईटेडका मिडफिल्डर पाउल पोग्बाले क्लबले आक्रमक खेल खेल्न आवश्यक रहेको बताएका छन् । घरेलु मैदान ओल्डट्राफोर्डमा खेल्दा क्लबले आक्रमक खेल खेलोस भन्ने आफ्नो चाहना रहेको उनले खुलाएका हुन् ।
म्यान यु घरेलु मैदानमा गत शनिबार उल्भ्ससंग बराबरीमा रोकिएको थियो । अघिल्लो खेलमा उसले टोटेनहमसंग ३–० ले हार ब्यहोरेको थियो । ‘हामी घरमा छौ र हामीले उल्भ्सविरुद्ध अझ राम्रो खेल्न सक्नपर्छ । हामी यहाँ आक्रमक खेल खेल्नकालागि हो ।’ पोग्बाले भने ।
‘जब हामी त्यसरी खेल्छौ । हामीलाई सजिलो हुनेछ ।’ उनले भने ।
घरेलु मैदानमा उल्भ्सविरुद्ध उत्रनु अघि म्यान युले लगातार तीन खेलमा जित निकालेको थियो । जसमा च्याम्पिन्स लिग अन्तर्गत स्विस टोलीविरुद्धको जित समेत समावेश थियो ।
पोग्बाकै पासमा फ्रेडले गोल गर्दै प्रिमियर लिगमा म्यान युले उल्भ्ससंग अंक बाँडेको थियो । बराबरीसंगै म्यान यु शीर्ष स्थानको लिभरपुल भन्दा ८ अंकले पछाडी परेको छ । अंक बाँडेपछि प्रशिक्षक जोसे माउरिन्होले आफ्ना खेलाडीहरु खेल जित्न उत्सुक नदेखिएको प्रतिक्रिया दिएका थिए ।
पोग्बा ईटालियन क्लब युभेन्ट्सबाट कीर्तिमानी रकम ८९ मिलियन पाउण्डमा म्यान यु आएका थिए । उनकै प्रेरणादायी प्रर्दशनका आधारमा फ्रान्सले यस बर्ष विश्वकपको उपाधि उचालेको थियो ।
