एजेन्सी । स्पेनिस ला लिगा फुटबल अन्तर्गत आज (आइतबार) बार्सिलोनाले जिरोनासंग प्रतिस्पर्धा गर्दैछ । लिगमा अपराजित रहेको बार्सिलोनाले घरेलु मैदानमै जिरोनासंग खेल्न लागेको हो ।
नाउ क्याम्पमा बार्सिलोना र जिरोनाबीचको खेल नेपाली समय अनुसार राति १२:३० मा सुरु हुनेछ । र, जिरोनाविरुद्ध मैदान उत्रदा बार्सिलोना अपराजित यात्रा कायम गर्न चाहन्छ ।
बार्सिलोनाले ४ खेलमा १२ अंक जोडेको छ । बार्सिलोना लिगको दोस्रो स्थानमा छ । बार्सिलोना रियल मड्रिडभन्दा १ अंकले पछि रहेको छ । बार्सिलोनालाई जिरोनाविरुद्ध जित निकाल्दै शीर्ष स्थानमा फर्कने मौका समेत रहेको छ । जिरोना ७ अंकसहित लिगको नवौं स्थानमा छ ।
ला लिगा अन्तर्गत नै आज अन्य ३ खेल हुनेछ । सेभियाले लेभान्टेसंग अपरान्ह ३ः४५ मा खेल्दैछ । भिया रियलले भ्यालेन्सियाविरुद्ध राति ८ः०० बजे प्रतिस्पर्धा गर्दा रियल बेटिसले एट्लेटिको बिल्बाओसंग राति ११ः४५ मा खेल्नेछ ।
