एजेन्सी । इन्ग्लिश क्लब चेल्सीले युरोपा लिग फुटबलको समूह चरणमा विजयी सुरुवात गरेको छ ।
बिहिबार राति भएको समूह चरणको पहिलो खेलमा चेल्सीले ग्रिसको पिएओकेलाई १ - ० ले हराएको हो ।
पिएओकेको मैदानमा भएको खेलमा चेल्सीलाई साँघुरो जित दिलाउन विलियन नायक बने । पहिलो हाफको सातौं मिनेटमा विलियनले गोल गर्दै चेल्सीलाई जित दिलाए ।
यो जितसंगै समूह 'एल' मा रहेको चेल्सीले महत्वपूर्ण ३ अंक जोडेको छ । पिएओके अंकबिहिन रहेको छ ।
यसै समूहको अर्को खेलमा बेलारुसको बाटे बेरिसोभले हंगेरीको मोल भिडी एफसीलाई २ - ० ले हराएको छ । जितसंगै यस समूहमा बाटे शीर्ष स्थानमा छ । बाटे गोल अन्तरमा चेल्सीभन्दा अघि रहेको छ ।
