एजेन्सी । युरोपियन फुटबलको प्रतिष्ठित प्रतियोगिता च्याम्पियन्स लिगमा आज (बुधबार) विभिन्न आठ खेलहरु हुँदैछ ।
च्याम्पियन्स लिग अन्तर्गत आज समूह 'ई', समूह 'एफ', समूह 'जी' र समूह 'एच' का दुई दुई खेल हुँदैछ ।
आज हुने खेलमध्ये सबैको पर्खाइको खेल समूह 'एच' को खेल हुनेछ । किनकी यस समूहमा पोर्चुगिज स्टार क्रिस्टियानो रोनाल्डो रहेको युभेन्ट्सले भ्यालेन्सियासंग प्रतिस्पर्धा गर्दैछन् ।
इटालियन क्लब युभेन्ट्सले स्पेनिस क्लब भ्यालेन्सियासंग उसैको मैदानमा खेल्नेछ । दुई टोलीबीचको खेल राति १२:४५ मा सुरु हुनेछ । र, यसै सिजन युभेन्ट्स आएका रोनाल्डोको प्रदर्शन कस्तो होला भन्ने सबैमा कौतुहलता रहेको छ ।
च्याम्पियन्स लिगमा गोल मेसिन मानिने रोनाल्डोले पुर्व क्लब रियल मड्रिडलाई लगातार ४ पटक उपाधि दिलाउन महत्वपूर्ण योगदान गरेका थिए ।
यस्तै चिरपरिचित प्रतिद्वन्द्वी लियोनल मेस्सीले बार्सिलोनाबाट पहिलो खेलमै ह्याट्रिक गरेपछि रोनाल्डोलाई दबाब आएको छ । मंगलबार राति मेस्सीले ह्याट्रिक गरेपछि बार्सिलोनाले पिएसभीलाई ४ - ० ले हराएको थियो ।
पिएसभीविरुद्ध ह्याट्रिक गरेसंगै मेस्सीले च्याम्पियन्स लिगमा सर्वाधिक ह्याट्रिक गर्ने खेलाडीको कीर्तिमान बनाएका थिए । मेस्सीले ९ ह्याट्रिक गर्दै रोनाल्डोलाई उछिनेका थिए । रोनाल्डोको नाममा आठ ह्याट्रिक रहेको छ ।
यसै समूह अन्तर्गत इन्ग्लिश क्लब म्यानचेस्टर युनाइटेडले योङ बोइजसंग प्रतिस्पर्धा गर्नेछन् । दुई टोलीबीचको खेल १४:४५ मै हुनेछ ।
च्याम्पियन्स लिग अन्तर्गत समूह 'ई' अन्तर्गत आयाक्स र एइके एथेन्स तथा बेन्फिका र वायर्न म्युनिखले प्रतिस्पर्धा गर्दैछन् । आयाक्स र एइके एथेन्सबीचको खेल राति १०:४० मा हुने छ भने बेन्फिका र वायर्न म्युनिखको खेल राति १२ :४५ मा हुनेछ ।
च्याम्पियन्स लिग अन्तर्गत समूह 'जी' मा रहेको साबिकको विजेता रियल मड्रिडले इटालियन क्लब रोमासंग खेल्नेछ । रियलको मैदानमा हुने खेल राति १२ :४५ मा हुनेछ । यसै समूहको अर्को खेलमा भिक्टोरियाले सीएसकेए मस्कोसंग खेल्नेछ ।
समूह 'एफ' अन्तर्गत हुने खेलमा इन्ग्लिश क्लब म्यानचेस्टर सिटीले लियोनसंग खेल्दैछ । सिटी र लियोनबीचको खेल राति १२ :४५ मा सुरु हुनेछ । यसै समूहमा रहेको होफेनहाइमले शाख्तर डोनेस्कसंग खेल्नेछ । दुई टोलीबीचको खेल १० :४० मा हुनेछ ।
