एजेन्सी । इन्ग्लिश प्रिमियर लिग फुटबलमा चेल्सीले जित निकालेको छ । शनिबार भएको खेलमा चेल्सीले कार्डिफ सिटीलाई ४ - १ ले हराएको हो ।
घरेलु मैदानमा इडेन हाजार्ड नायक बन्दा चेल्सीले पुनरागमन जित निकालेको हो । चेल्सीको जितमा हाजार्डले ह्याट्रिक गरे । यस्तै एक गोल विलियनको नाममा रह्यो । कार्डिफका सोल बाम्बाले एक गोल गरे ।
स्टामफोर्ड ब्रिजमा नवप्रवेशी क्लब कार्डिफले लिएको अग्रता उल्टाएर चेल्सीले जित हात पारेको हो । खेलको १६ औं मिनेटमा बाम्बाले गोल गर्दै कार्डिफलाई सुरुवाती अग्रता दिलाए ।
कार्डिफविरुद्ध पछि परेपनि चेल्सीका हाजार्ड नायक बनेर देखा परे । ३७ औं मिनेटमा गोल गर्दै हाजार्डले चेल्सीलाई खेलमा फर्काए । खेलको ४४ औं मिनेटमा हाजार्डले व्यक्तिगत दोस्रो गोल गर्दै चेल्सीलाई २ - १ को अग्रता दिलाए ।
खेलको ८० औं मिनेटमा पाएको पेनाल्टीमा गोल गर्दै हाजार्डले ह्याट्रिक पुरा गर्दै टोलीलाई ३ - १ को अग्रता दिलाए । त्यसपछि खेलको ८३ औं मिनेटमा विलियनले एक गोल गर्दा चेल्सीले ४ - १ को जित निकाल्यो ।
जितसंगै चेल्सी लिगको शीर्ष स्थानमा उक्लिएको छ । चेल्सीले लिभरपुललाई गोल अन्तरमा पछि पार्दै शीर्ष स्थान ओगटेको हो । चेल्सीले ५ खेलबाट शतप्रतिशत जितसहित १५ अंक जोडेको छ । कार्डिफको ५ खेलबाट २ अंक छ ।
प्रिमियर लिग अन्तर्गत नै शनिबार बोर्नेमाउथले लेष्टर सिटीलाई ४ - २ ले पराजित गरेको छ । यस्तै क्रिस्टल प्यालेसले हर्ड्सफिल्डलाई १ - ० ले पराजित गर्यो ।
-1734919437.jpg)
-1734918317.jpg)
