एजेन्सी । वेस्ट इन्डिजका अलराउण्डर किमो पाउले होबर्ट हुरिकेन्सबाट अष्ट्रेलियाको बिग बास लिग (बीबीएल) क्रिकेट खेल्ने भएका छन् ।
होबर्टले बुधबार विदेशी खेलाडीको कोटामा किमोलाई अनुबन्धन गरिएको जनाएको छ ।
२२ वर्षीय पाउलले पहिलो पटक बीबीएल खेल्न लागेका हुन् ।
अष्ट्रेलियन विश्व विजेता कप्तान तथा प्रशिक्षक रिक्की पोण्टिङको सिफारिसमा होबर्टले पाउललाई अनुबन्धन गरेको हो ।
पाउलले सन् २०१८ मा अफगानिस्तानविरुद्ध टी-ट्वान्टी अन्तराष्ट्रियमा डेब्यु गरेका थिए । त्यस यता उनले १८ खेलमा २४ विकेट लिंदै १ सय ४२ रन बनाउन सफल भएका छन् ।
पाउल अहिले न्युजिल्याण्डमा वेस्ट इन्डिजको टिमसँग व्यस्त रहेका छन् । न्युजिल्यान्डविरुद्धको सिरिज सकिएसँगै उनी होबर्टसँग जोडिने छन् ।
'आउने बीबीएलको लागि होबर्टमा जोडिन पाउँदा निकै उत्साहित छु । र, यस मौकाको लागि आभारी समेत छु,' होबर्टसँग अनुबन्धित भएपछि पाउलले भने , 'बीबीएलको समर्थक हुँ र जहिल्यै खेल हेर्ने गर्थें । रिक्की पोण्टिङसँग आईपीएलमा होबर्ट र तास्मनिया क्रिकेटको बारेमा छलफल भएको थियो ।'
होबर्टका प्रशिक्षक आदम ग्रिफ्टले पाउलको आगमनले टिममा उत्साह बढेको बताए ।
होबर्टले आफ्नो अन्तिम विदेशी खेलाडी बिहीबार सार्वजनिक गर्दैछ । यसपटक नेपाली ग्लोबल आइकन सन्दीप लामिछानेले समेत होबर्टबाट खेल्न सक्ने अनुमान गरिएको छ ।
-1736646447.jpg)
-1736609631.jpeg)
