एजेन्सी । इन्ग्लिश प्रिमियर लिग फुटबलमा आर्सनलले संघर्षपूर्ण जित निकालेको छ । आइतबार भएको खेलमा आर्सनलले कार्डिफ सिटीलाई ३-२ ले हराएको हो ।
कार्डिफको मैदानमा भएको खेलमा आर्सनललाई जित दिलाउन साकोर्डन मुस्ताफी, पेरिक एम्रिक आबुमियाङ र एलेक्जेन्डर लाकाजेट्सले एक एक गोल गरे । कार्डिफका भिक्टर कमारासा र डानी वार्डले एक एक गोल फर्काए ।
पहिलो हाफ १-१ गोलको बराबरीमा सकिएको खेलको दोस्रो हाफमा दुई गोल गर्दै आर्सनलले महत्वपूर्ण जित निकालेको हो । खेलको ११ औं मिनेटमा मुस्ताफीले गोल गर्दै आर्सनललाई सुरुवाती अग्रता दिलाएका थिए । तर, खेलको ४५ औं मिनेटमा कार्डिफका भिक्टरले गोल गर्दै खेल १-१ को बराबरीमा ल्याए ।
खेलको ६२ औं मिनेटमा आबुमियाङले गोल गर्दै आर्सनललाई २-१ को अग्रता दिलाए । ७० औं मिनेटमा कार्डिफका वार्डले गोल गर्दै खेल २-२ को बराबरीमा ल्याए । तर, खेलको ८१ औं मिनेटमा लाकाजेट्सले गोल गर्दै आर्सनललाई ३ - २ को महत्वपूर्ण जित दिलाए ।
जितसंगै आर्सनलले महत्वपूर्ण ३ अंक जोडेको छ । आर्सनलको यो चौथो खेलमा दोस्रो जित हो । जितपछि ६ अंक जोडेको आर्सनल नवौं स्थानमा रहेको छ । पराजित कार्डिफको २ अंक रहेको छ ।
