एजेन्सी । इटालियन सिरी ए फुटबलमा इन्टर मिलान बराबरीमा रोकिएको छ । आइतबार राति भएको खेलमा इन्टर मिलान टोरिनोसंग २ - २ गोलको बराबरीमा रोकिएको हो ।
घरेलु मैदानमा पहिलो हाफमा लिएको २ गोलको अग्रता जोगाउन नसक्दा इन्टर बराबरीमा रोकिएको हो । बराबरीसंगै इन्टर महत्वपूर्ण ३ अंक जोड्न असफल भएको छ ।
खेलको छैटौं मिनेटमा इभान पेरसिचले गोल गर्दै इन्टरलाई सुरुवाती अग्रता दिलाए । खेलको ३२ औं मिनेटमा स्टेफान डी भिर्जले गोल गरेपछि पहिलो हाफमा मिलान २ - ० ले अघि रह्यो ।
तर, दोस्रो हाफमा इन्टरले दुई गोलको अग्रता जोगाउन सकेन । टोरिनोले उत्कृष्ट पुनरागमन गर्यो ।
खेलको ५५ औं मिनेटमा टोरिनोका आन्द्रिया बेलोट्टीले गोल गर्दै खेल २ - १ मा ल्याए । त्यसपछि खेलको ६८ औं मिनेटमा सौअलिहो मेईटेले गोल गर्दै खेल २ - २ को बराबरीमा ल्याए ।
यो बराबरीसंगै इन्टरले २ खेलबाट १ अंक जोडेको छ । यसअघि पहिलो खेलमा इन्टर नेपोलीसंग पराजित भएको थियो । पहिलो खेल हारेको टोरिनोले पनि १ अंक जोडेको छ ।
