एजेन्सी । इन्ग्लिश प्रिमियर लिग फुटबलमा चेल्सीले संघर्षपूर्ण जित निकालेको छ । आइतबार भएको खेलमा चेल्सीले न्युकासल युनाइटेडलाई २ - १ गोल अन्तरले पराजित गरेको हो ।
न्युकासलको मैदानमा चेल्सीले खेलको अन्त्यतिर पाएको एक आत्मघाती गोल उपहारले महत्वपूर्ण ३ अंक जोडेको हो । यस्तै चेल्सीको जितमा एक गोल इडेन हाजार्डले गरे । न्युकासलका जोसेलुले एक गोल गर्दा डीआन्द्रे एड्लिनले एक आत्मघाती गोल गरे ।
पहिलो हाफ गोलरहित बराबरीमा सकिएको खेलको ७६ औं मिनेटमा हाजार्डले पेनाल्टीबाट गोल गर्दै चेल्सीलाई सुरुवाती अग्रता दिलाए । खेलको ८३ औं मिनेटमा जोसेलुले गोल गर्दै न्युकासललाई खेलमा फर्काए । तर, खेलको ८७ औं मिनेटमा एड्लिनले आत्मघाती गोल गरेपछि चेल्सीले २ - १ को संघर्षपूर्ण जित निकालेको हो ।
जितसंगै चेल्सीले ३ खेलबाट ९ अंक जोडेको छ । चेल्सी लिगको दोस्रो स्थानमा छ । समान ९ अंक जोडेको लिभरपुल शीर्ष स्थानमा छ । न्युकासलको मात्र एक अंक छ ।
इन्ग्लिश प्रिमियर लिग अन्तर्गत नै आइतबार वाट्फोर्डले क्रिष्टल प्यालेसले २ - १ ले हराएको छ । यस्तै फुलहमले बर्नेलीलाई ४ - २ ले हराएको छ ।
