पोखरा । कोरोना भाइरसको संक्रमण फैलन नदिन पुरा देश लकडाउनको अवस्थामा छ । चैत ११ बाट लागू गरिएको लकडाउनले देशका अधिकांश विकास आयोजना ठप्प जस्तै छन् ।
तर, पोखरा रंगशाला भित्र थालिएको वैकल्पिक फुटबल मैदानको निर्माणले भने तिव्रता पाएको छ ।
संघीय सरकारको ९० लाख बजेटमा बनिरहेको सो मैदान निर्माणको काम अहिले जोडतोडले अघि बढिरहेको छ ।
निर्माणको करिब ८० प्रतिशत काम सकिएको पश्चिमाञ्चल क्षेत्रीय खेलकुद समितिका इन्जिनियर प्रनिश ताम्राकारले खेलपाटीलाई बताए । मैदानमा अहिले दुबो लगाउने काम भइरहेको छ ।
‘संघीय सरकारले मैदानका लागि ९० लाख बजेट विनियोजन गरेको छ । करिब ८० प्रतिशत काम सकेका छौ ।’ उनले भने, ‘अहिले मैदान समथर बनाउने काम सकेर दुबो लगाउने कार्य भईरहेको छ ।’
मैदान निर्माणमा करिब ३० जना कर्मचारीले काम गरिरहेका ताम्राकारको भनाई छ । निर्माण कार्यमा संलग्न श्रमिकले कोरोनाको संक्रमणबाट बच्न मास्क, पन्जा जस्ता सुरक्षा सामग्रीको प्रयोग गरेर काम गरिरहेको उनले बताए ।
१३ औं दक्षिण एसियाली खेलकुद (साग) अगाडीनै वैकल्पिक फुटबल मैदानको निर्माण कार्य पुरा गर्ने लक्ष्य राखिएको थियो । तर प्रतियोगिता आयोजना लगायतका विविध कारणले निर्माण कार्य समयमै पुरा हुन सकेन । करिब तीन महिना अलपत्र परेको निर्माणको कामले लकडाउनको समयमा तिव्रता पाएको ताम्राकार बताउँछन् ।
एन्फा कास्कीको आन्तरिक विवाद, बजेट लगायतका समस्याले मैदान निर्माणको काम प्रभावित बनेको थियो ।
‘यसअघि निकासा भएको ३० लाख बजेट बराबरको काम एन्फा कास्कीका पदाधिकारी सम्मिलित समितिले गर्यो ।’ ईन्जिनियर ताम्राकारले थपे, ‘बजेट निकासामा समस्या भयो । एन्फा कास्कीको किचलोले समेत काम प्रभावित बन्यो ।’
एन्फा कास्कीका पूर्व सचिव सुदर्शन रन्जितका अनुसार २०६४ सालमा निर्माण कार्य सुरु गरिएपनि विविध कारणले मैदान बनाउने कार्य बिचमा रोकिएको हो ।
गण्डकी प्रदेशमा आयोजना हुने तय भएको नवौं राष्ट्रिय खेलकुदलाई ध्यानमा राखेर पुन निर्माण कार्य थालिएको रन्जित बताउँछन् ।
उनका अनुसार नेपाल र पाकिस्तानबीच मैत्रीपूर्ण खेलबाट उठेको टिकटको रकमले मैदान निर्माणको काम सुरु गरिएको हो ।
युवा तथा खेलकुद मन्त्रालयले गत बर्ष मैदान निर्माणमा ९० लाख रुपैयाँ विनियोजन गरे पनि एन्फा कास्कीको विवादले निर्माण कार्य अलपत्र बनेको थियो ।
मैदान निर्माण कार्यको नेतृत्व गरिरहेका राखेपका सदस्य राजेश गुरुङ मैदानमा सानो प्यारापिट जडान गर्ने योजना भएको बताउँछन् । उनले मैदानमा चेन्जिङ रुम र खानेपानीको व्यवस्था गर्ने योजना रहेको उल्लेख गर्दै सो प्रस्ताव राखेपमा राखेका सुनाउँछन् ।
‘मैदानमा चेन्जिङ रुम निर्माण र खानेपानीका लागि कुरा भइसकेको छ ।’ उनले भने, ‘मिनी प्यारापिट जडान गर्ने योजना बनाएका छौ । त्यसका लागि राखेप सदस्य सचिवसंग कुरा गर्दै छौं ।’
उनले मैदान निर्माणको काम मात्र नभएर १३ औं सागमा अलपत्र बनेका अन्य संरचनाको समेत मर्मत गरिरहेको बताए ।
‘सागमा अलपत्र बनेका पार्किङ, बाटो जस्ता संरचना पनि मर्मत गरिरहेका छौ ।’ उनले भने ।
१३ औं सागका अधिकांश खेल काठमाडौं र पोखरामा आयोजना गरिएको थियो । कुस्तीको एक खेलमात्र जनकपुरमा आयोजना गरिएको थियो ।
राखेप बोर्ड सदस्य गुरुङले सागमा भएका कमि कमजोरी सच्याउँदै फागुनमा हुने नवौं राष्ट्रिय खेलकुदलाई सफल बनाएर छाड्ने प्रतिबद्धता जनाए । कोरोनाको कहर सकिए लगत्तै नवौं राष्ट्रिय खेलकुदको तयारीमा जुट्ने उल्लेख गरे ।
‘१३ औं सागमा हतारमा गर्यौं । बाध्यता पनि थियो,’ उनले भने, ‘केही कमजोरी रह्यो । त्यसबाट सिक्दै नवौं राष्ट्रिय खेलकुदमा गल्ती गर्ने छैनौ । कोरोना रोकिएपछि त्यसको तयारीलाई तिव्रता दिनेछौ ।’
नवौं राष्ट्रिय खेलकुदका लागि पौडी र सुटिङको मात्र संरचना निर्माण गर्न बाँकी रहेको सुनाउँदै उनले बाँकी संरचना पनि छिट्टै बनाइने उल्लेख गरे ।
