एजेन्सी । घरेलु टिम इंग्ल्यान्ड र वेष्ट इण्डिजबीच आगामी जुनमा तय भएको टेष्ट सिरिज स्थगित भएको छ ।
विश्वभर महामारीको रुपमा फैलिएको कोरोना भाईरसको कारण सिरिज स्थगित गरिएको हो ।
कोरोनाको कारण इंग्ल्यान्ड र वेल्स क्रिकेट बोर्ड (ईसीबी) ले बिहिबार जुलाई १ सम्म क्रिकेट गतिविधि नगर्ने निर्णय गरेसँगै टेष्ट सिरिज स्थगित भएको हो ।
इंग्ल्यान्ड र वेष्ट इण्डिजबीचको सिरिज आगामी जुन ४ बाट हुने तय भएको थियो । दुई टोलीबीच तीन खेलको सिरिज हुने तालिका रहेको थियो ।
ईसीबीले स्थगित अन्तर्राष्ट्रिय सिरिज जुलाईबाट सेप्टेम्बरको अन्तिमसम्म गर्ने योजना बनाएको समेत जनाएको छ ।
वेष्ट इण्डिजले भने उक्त सिरिज आफ्नो देशमा खेल्न इंग्ल्यान्डलाई प्रस्ताव राख्दै आएको छ ।
कोरोनाको कारण ईसीबीले काउन्टी क्रिकेट मेसम्मको लागि स्थगित गरिसकेको छ ।
