काठमाडौं । राष्ट्रिय क्रिकेट टिमका पूर्व कप्तान पारस खड्काले १६ वर्ष अघि आजकै दिन राष्ट्रिय टिममा डेब्यु गरेका थिए ।
त्रिवि क्रिकेट मैदानमा सन् २००४ अप्रिल २३ का दिन पारसले सिनियर टिममा डेब्यु गरेका थिए । आईसीसी अन्तरमहादेशीय कपमा मलेसियाविरुद्धको खेलबाट पारसले डेब्यु गरेका हुन् ।
आईसीसी अन्तरमहादेशीय कपबाट डेब्यु गरेपनि पारसले १६ वर्षे करियरमा पारसले २ प्रथम श्रेणीको क्रिकेट मात्र खेलेका छन् ।
लामो समयबाट आईसीसी अन्तरमहादेशीय कपमा छनोट हुन नसक्दा र घरेलु क्रिकेटमा लामो फर्म्याटको क्रिकेट नहुँदा नेपाल त्यसबाट बन्चित हुँदै आएको छ ।
आईसीसीबाट एकदिवसीय अन्तर्राष्ट्रिय क्रिकेटको मान्यता पाएसँगै नेपाल पुन: अन्तरमहादेशीय कपमा छनोट भएको छ । तर, आईसीसीले अन्तरमहादेशीय कपलाई विस्थापित गर्ने जनाएको छ ।
डेब्यु खेलमा पारसले ४४ रन र एक विकेट लिएका थिए । जुन खेल नेपालले ९ विकेटले जितेको थियो । नेपालको पहिलो प्रथम श्रेणीको जित पनि त्यहीँ थियो ।
पारसले सिनियर टिममा डेब्यु गर्दा बनेको ५ रोचक तथ्यलाई तल व्याख्या गरिएको छ ।
१. घरेलु मैदानमा पहिलो प्रथम श्रेणी
नेपालले सन् २००४ मा सारजाहमा युएईविरुद्ध खेल्दै पहिलो श्रेणीको क्रिकेटमा डेब्यु गरेको थियो । नेपालले आईसीसी अन्तरमहादेशीय कपमा युएई र मलेसियासँग प्रथम श्रेणीको क्रिकेट खेल्ने मौका पाएको थियो ।
दुई खेल मध्ये युएईसँग नेपालले बराबरी खेलेको थियो भने मलेसियालाई पराजित गर्न सफल भएको थियो । युएईसँग नेपालले उसैको मैदान सारजाहमा खेलेको थियो भने मलेसियासँग त्रिवि क्रिकेट मैदानमा खेलेको थियो । नेपालले पहिलो पटक त्रिवि मैदानमा प्रथम श्रेणीको क्रिकेट खेलेको थियो ।
प्रतियोगितामा एक जित र एक बराबरी खेलेपनि सेमिफाईनल पुग्न भने नेपाल असफल भएको थियो ।
२. विकास दलीको डेब्युसँगै अन्तिम खेल
मलेसियाविरुद्ध नेपालका दुई खेलाडीले प्रथम श्रेणी क्रिकेटमा डेब्यु गरेका थिए । पारस खड्कासँगै विकास दलीले सिनियर क्रिकेटमा डेब्यु गरे ।
डेब्यु खेलमा विकासले पहिलो इनिङमा १२ बलमा ५ रन बनाएर आउट भएका थिए । यस्तै दोस्रो इनिङमा उनी ४ बलमा २ रन बनाउदै अविजित रहेका थिए ।
विकाससँगै डेब्यु गरेका पारस हालसम्म क्रिकेटमा सक्रिय छन् र सफल समेत छन् । तर, पारससंगै डेब्यु गरेका विकासले भने मलेसियाविरुद्धको प्रथम श्रेणी क्रिकेट बाहेक कुनै खेलमा नेपालको जर्सी लगाउने मौका पाएनन् ।
केही समय राष्ट्रिय क्रिकेट टिमको वैकल्पिक खेलाडीमा रहे पनि उनले सुरुवाती-११ मा स्थान बनाउन सकेनन् । बिस्तारै उनलाई राष्ट्रिय टिमले बिर्सदै गयो ।
३. तीन खेलाडीको अन्तिम खेल
पारस खड्काले डेब्यु गरेको खेलमा विकास बाहेक अन्य ३ खेलाडीको लागि समेत अन्तिम प्रथम श्रेणी क्रिकेट बन्यो । नेपालका पूर्व कप्तान राजु खड्का, विकेटकिपर मनोज कटुवाल र सन्जम रेग्मीले अन्तिम पटक प्रथम श्रेणीको क्रिकेट खेले ।
४. दुई खेलाडी प्लेअर अफ दि म्याच
मलेसियाविरुद्धको प्रथम श्रेणीमा नेपालले जित हात पार्दा नेपालका २ खेलाडीले प्लेअर अफ दि म्याच अवार्ड जितेका थिए ।
खेलमा नेपाललाई ऐतिहासिक जित दिलाउन ठुलो भूमिका खेलका शक्ति गौचन र महबुब आलमले प्लेअर अफ दि म्याच हात पारे ।
शक्ति गौचनले पहिलो इनिङमा सर्वाधिक ६९ रनको अविजित इनिङ्स खेल्दा दोस्रो इनिङमा बलिङ गर्दा १ विकेट हात पारे । यस्तै महबुबले दुवै इनिङमा समान ३/३ विकेट हात पार्दा ब्याटिङतर्फ २२ र १५ रन बनाएका थिए ।
५. प्रथम श्रेणीमा पहिलो जित
मलेसियालाई ९ विकेटले पराजित गर्दा नेपालले घरेलु भूमिमा पहिलो पटक प्रथम श्रेणीको क्रिकेटमा जित निकालेको थियो । त्यसअघि नेपालले युएईसँग सारजाहमा बराबरी खेलेको थियो ।
