काठमाडौं । कोरोना भाईरसको महामारीको कारण करिब एक महिनाबाट नेपाल लकडाउन रहेको छ । अत्यावश्यक बाहेक सबै क्षेत्र बन्द रहेको छ ।
कोरोनाको कारण गरिएको लकडाउनको मारमा खेलकुदमा समेत परेको छ ।
सम्पूर्ण खेलकुद गतिविधि बन्द हुँदा खेलाडी समेत खेलबाट टाढा रहेका छन् । यस्तो समयमा खेलाडीलाई फिटनेस र लयको चिन्ता छ ।
तर, नेपाली राष्ट्रिय क्रिकेट टिमका सदस्य तथा मिडियम फास्ट बलर अविनास बोहरालाई भने लकडाउनले खासै असर गरेको छैन । यस अर्थमा कि उनी हरेक दिन जस्तो अभ्यासमा ब्यस्त हुन्छन् ।
लकडाउनको समयमा समेत अविनास कीर्तिपुरको त्रिवि मैदान र इन्डोर हलमा अभ्यासमा व्यस्त छन् । नियमित जस्तै उनी मैदान पुगेर अभ्यास गर्ने गरेका छन् ।
अविनास यतिवेला आफु बस्ने कोठा र त्रिवि मैदान नजिक भएको फाइदा उठाईरहेका छन् ।
'दिनको दुई पटक मैदान (त्रिवि) आउँछु र एक्लै अभ्यासमा व्यस्त हुन्छु,' अविनासले त्रिवि मैदानबाटै खेलपाटीलाई भने, 'बिहान रनिङ गरेर बलिङ ड्रिल गर्छु बेलुका बलिङ अभ्यास ।'
मैदानमा एक्लै अभ्यास गर्ने भएपनि केहि कुरामा उनलाई मैदानको कर्मचारीहरुले सहयोग गर्ने गरेका छन् ।
'लकडाउन भएको कारण एक्लै अभ्यासमा हुन्छु,' उनले थपे, 'कहिलेकाँही ग्राउण्ड स्टाफ भाइहरुले सहयोग गर्छन् ।'
मैदान र आफु बस्ने कोठा नजिकै भएको कारण मैदानमा अभ्यास गर्न अविनासलाई सम्भव भएको हो ।
'मैदान र मेरो कोठा नजिकै छ त्यसैले आउन र अभ्यास गर्न कठिन छैन । कहिलेकाँही त दिनभरि नै मैदानमा हुन्छु,' अविनासले भने ।
नियमित अभ्यासमा रमाईरहेका कारण अविनासलाई लकडाउनले खासै असर गरेको छैन ।
'त्रिविमै अभ्यास गर्न पाएको छु र आवश्यक जिमको सामान घरैमा भएकोले घरैमा जिम समेत गर्ने गरेको छु। लकडाउनले मलाई खासै असर गरेको छैन,' अविनास भन्छन् ।
अविनासले आम समर्थक तथा नेपालीहरुलाई अहिले कठिन अवस्थामा सचेत र संयम भएर बस्न समेत आग्रह गरे ।
'घरैमा बसौं, स्वास्थ्य रहौं,' उनले समर्थकलाई आग्रह गर्दै भने, 'यस्तो समयमा सकारात्मक भएर सरकार र चिकित्सकको आग्रह पालना गर्दै महामारीलाई जित्न सहयोग गर्न अनुरोध गर्छु ।'
२२ वर्षीय अविनासले नेपालबाट १९ टी-ट्वान्टी अन्तराष्ट्रिय इनिङ्समा २० विकेट लिन सफल छन् । उनी आफ्नो डेब्यु टी-ट्वान्टी अन्तर्राष्ट्रिय सिरिजमा (युएईविरुद्ध सन् २०१९) म्यान अफ द सिरिज घोषित भएका थिए ।
नेपालको लागि अविनास डेथ ओभर स्पेसलिस्ट हुन् । डेथ ओभरमा बलिङ गर्ने उनको टी-ट्वान्टी अन्तर्राष्ट्रियमा ६ दशमलब ६ को इकोनमी रहेको छ ।
